Mahmud Qurbanovu müdafiə xətti narahat edir - AÇIQLAMA
Ötən mövsüm autsayder olan "Səbail" yeni “futbol ili”nə Mahmud Qurbanovun rəhəbərliyi altında başlayacaq.
Mütəxəssis komandanı, demək olar ki, yenidən formalaşdırır. "Dənizçilər” heyəti gücləndirməklə yanaşı, Gürcüstanda təlim-məşq toplanışında da oldu. Bu və başqa məsələlərlə bağlı Mahmud Qurbanovla danışdıq:"Bildiyiniz kimi, komandanı yenidən formalaşdırırıq. Təlim-məşq toplanışını normal keçirdik. Gürcüstanda üç yoxlama oyununa çıxdıq. Həmin matçların bizə çox faydası olduğunu düşünürəm. Səhvlər, çatışmazlıqlar üzə çıxdı. Hücumdakı çıxışımızdan daha çox razıyam. Amma müdafiə xəttində hələ çox işləməliyik. “Çempionata 100 faiz hazırıq” desək, doğru olmaz. Görüləcək çox işlər var. Ən azı premyer-liqada 2-3 matç keçirməklə həm oyunumuzu “oturtmalı”, həm də nöqsanları aradan qaldırmalıyıq. İlk turda "Qarabağ"la qarşılaşacağıq. Ağdam təmsilçisi barədə nəsə deməyə ehtiyac yoxdu. Bu komandanın nəyə qadir olduğunu bütün dünya bilir. Amma çempionata yaxşı başlamaq istəyirik. Uzun marafonda əsas məqsəd oyundan-oyuna “artırıb”, daha yaxşı performans sərgiləmək, maksimum xal toplayıb irəli getməkdi".
ABDULLA İSMAYILOĞLU
Digər xəbərlər
