Aftandil Hacıyevin “Səbail”dən ayrılmasından sonra bir neçə mütəxəssisin adı “dənizçilər”lə yanaşı hallansa da, klub rəhbərliyi sonda Mahmud Qurbanovun namizədliyi üzərində dayandı.

"Football-plus.az" xəbər verir ki, mayın 10-da 49 yaşını qeyd tamamlayan PRO kateqoriyalı mütəxəssis məşqçilik karyerası ərzində ikinci dəfə premyer-liqa klubunun “sükanı arxasında” olacaq. Azərbaycan futbol ictimaiyyəti arasında daha çox “professor” ləqəbi ilə tanan Qurbanov 2012/13 mövsümündə “Kəpəz”i çalışdırıb. Fərqli illərdə ölkənin əsas komandasında köməkçi-məşqçi kimi də fəaliyyət göstərib. Son iş yeri isə “Neftçi-2” olub.

“Səbail”in baş məşqçisi postuna yeni təyinat alan mütəxəssislə əlaqə saxlayıb, ətraflı söhbətləşmək istədik. “Professor” geniş müsahibə vermək

istəmədiyini bildirsə də, bəzi suallara cavab verdi.

- “Səbail”dən təklif gələndə çox düşündüz?

- Təklif gəldi, klub rəhbərliyi ilə görüşüb danışdıq. Həm qarşı tərəf, həm də mən fikirlərimizi söylədik. Müzakirələr zamanı futbola baxışımız, demək olar, üst-üstə düşdüyündən əl sıxıb, razılığa gəldik.

- Söylənilənlərə inansaq, növbəti mövsüm üçün “Səbail”in büdcəsi başa çatan “futbol ili” ilə müqayisədə bir neçə dəfə artacaq. Təklifi dəyərləndirməyinizdə bu məqamın həlledici olduğunu desək, səhv etmərik?

- “Səbail”dən əvvəl “Neftçi-2”ni çalışdırırdım. Əvəzedici komanda olsa da, divizion üçün iddiamız var idi. Premyer-liqada da iddiasız klubda çalışmaram. Bir dəfə elita klubunda çalışmışam və necə olduğunu bilirəm, müəyyən təcrübəm var. Çalışacağım komanda ilə uğur qazanmaq istəyirəm ki, bunun üçün də maliyyə lazımdı. Kiçik büdcə ilə isə istədiyin nəticəni əldə etmək çətindi. “Səbail” rəhbərliyi ilə görüşdə bu mövzu barədə də söhbətimiz oldu. Onlar lazımi dəstək verəcəklərini bildirdilər. Fikrimcə, ayrılan büdcə ilə normal komanda formalaşdırmaq mümkündü.

- 2022/23 “futbol ili”ndə “Səbail”in avrokuboklara iddialı olacağı deyilir. Bu xəbər nə dərəcədə həqiqəti əks etdirir?

- Çalışacağıq ilk növbədə rəqabətədavamlı kollektiv formalaşdıraq. Avrokuboklara iddialı olacağımıza gəlincə, çempionatda bacardığımız qədər üst pillələrdə qərarlaşmağa çalışacağıq. Konkret ilk mövsümdə komandanı avrokuboklara çıxarmaq vəzifəsi qoyulmayıb. Ancaq çalışacağıq etimadı doğruldaq, azarkeşləri sevindirək.

- Köməkçiləriniz kimlər olacaq?

- Məşçilər korpusunda Tofiq Mustafayevlə Zaur Ramazanovun olacağı dəqiqləşib. “Neftçi-2”də birgə çalışdığım Elşən Poladov isə qapıçılar üzrə məşqçi olacaq.

- “Səbail”də dəyişiklik çox olacaq, köhnə heyətdən kimləri saxlamaq fikiriniz var?

- Demək olar ki, heç kimi. Əksəriyyətinin müqaviləsinin müddəti başa çatıb. Legionerlərin hamısı göndərilib. Onların əvəzinə yeni əcnəbi oyunçular cəlb olunacaq. Yerlilərdən isə bəziləri ilə danışıqlar gedir. Onları saxlamaq istəyirik.

- 9 ildən sonra baş məşqçi kimi yenidən premyer-liqada çalışmaq necə hissdi?

- Uzun illərdi futbolun içindəyəm. Bu sahənin incəliklərinə bələdəm. Qeyri-adi hiss keçirməsəm də, hansı məsuliyyətin altına girdiyimi yaxşı dərk edirəm. Yığmada köməkçi-məşqçi, "Kəpəz" və "Neftçi-2"də baş məşqçi işlədiyim dönəmdə işimə necə məsuliyyətlə yanaşmısam, elə də davam edəcəm. 9 il əvvəllə müqayisədə, deyərdim ki, bir qədər təcrübəm artıb.

HƏMİD