Misli premyer-lqasının XI turunda keçirilən "Qəbələ" - "Kəpəz" matçından (1:1) sonra qonaq komandanın baş məşqçisi Tərlan Əhmədov jurnalistlərin suallarını cavablandırdı.

"Footbal-plu.az" xəbər verir ki, o, əvvəlcə görüşlə bağlı fikirlərini bildirdi:

- Oyuna ciddi hazırlaşmışdıq. Oturuşmuş komanda ilə çətin qarşılaşma oldu. İlk dəqiqələrdə həyəcan var idi. Səhvlərlə başladıq. Lakin komandanın 2-ci hissədəki oyunu məni qane etdi. Rəqibin əks-hücumlara daha üstünlük verəcəyini bilirdik. İlk hissədə ritmdə axsama var idi və bu səbəbdən Ruslan Süleymanovu əvəzlədik. "Qəbələ"dən səfərdə 1 xal almaq xoşdu. Görəcəyimiz iş çoxdu. Komandanı təbrik edirəm.

- Komandanın oyununda irəliləyiş hiss olunur. Bu heyətdən daha artığını gözləmək mümkündü?

- Əlbəttə. Bəzi oyunçuları cəzalandırmışam. İlk növbədə nizam-intizamı düzəltmək lazımdı. 7 oyun ardıcıl uduzan komandaya gəlmək də tərəddüdlü idi. Belə bir yükün altına girdik. Heyətdəki oyunçulara baxdıqdan sonra gördük ki, bu komanda ilə nəsə etmək olar. Məğlub olsaq belə, irəliləyiş var. "Sabah"a 0:5 hesablı məğlubiyyətdə də the biz verdik. Fərdi səhvlərə görə belə uduzduq. Komandada inkişaf var. Yanvara qədər yaxşı işlər görmək olar. Qələbə qazanmaq gücündəyik. Zədəlilərimiz də qayıtsın, hər halda başqa komanda görəcəyik. Zamiq Əliyev də bir müddət kənarda qalacaq. Nəticələr olduqdan sonra "Kəpəz" layiq olduğu yeri tutacaq.

- "Kəpəz"in sabiq baş məşqçisi Yaşar Vahabzadə ilə danışırsız?
- Bu işə gələndə danışdım və dedim ki, halallıq ver. Yaşar müəllim məndən yaşlıdır, ona böyük hörmətim var. Münasibətimiz yaxşıdır. Onunla sentyabrdan bəri danışmamışıq.

- Rauf Əliyev əsas komandaya qayıdacaq?
- Xeyr. Bu məsələ mənim üçün bağlanıb. Yanvarda yeni nəfəslər gələcək. Akademiyadan da bir neçə oyunçu var ki, izləyirəm. 17 yaşlı bir futbolçunu komandaya cəlb etmişəm. Hücumçu axtarışlarımız da davam edir.

- Oyun zamanı fərdi səhvlər edən oyunçularınıza çox qəzəblənirdiz. Sanki infarkt keçirəcəkdiz. Sizi əsəbiləşdirənlər çoxdur?
- Bizim işimiz emosionaldır. Oyundan əvvəl üzərində dayandığım epizodlarda yenə səhvlər etdik. Bəzi futbolçular öz səviyyəsindən aşağı çıxış etdi. Əsəb həyatımızın bir parçasına çevrilib. Qurduğum komandanın daha rahat olmasını istəyirdim. Hərdən deyirəm ki, bu əsəblə şəkərə tutulacam. Hər şeyi anidən dəyişmək olmur. Tural Axundov da yavaş-yavaş bərpa olur. Onunla yanaşı, başqa oyunçular da var ki, öz formasından uzaqdır. Hər futbolçuya düşmən olub, onu kənarlaşdıra bilmərəm. Bu, həyatdır və həyatda hər şey mümkündür.

- Qapıçı transferi gündəmdədir?
- Xorvatiyalı qapıçı dəvət etmişik. Sənədlərində problemlər yaranıb, ona görə bu məsələ uzanır. Ümumi götürsək, qapıçı məsələsi gündəmdədir. Əcnəbi və yerlilər üzərində işləyirik.

- Əli Səmədovu da əvəzedici komandaga göndərdiz, orada da qol vurdu. Rauf Əliyev də qollara imza atır. Onları qaytarmağı düşünmürsüz?
- Rauf məsələsi gündəmə gələ bilməz. Divizionda qol vura bilər. Lakin bu məsələyə bir daha qayıtmayacam. Səmədov bir müddət əvəzedicilərdə olmalıdır. Hər kəs bilməlidir ki, burada əvəzedilməz biri yoxdur. Hər futbolçu oynamağa layiqdir. Meydana çıxan oyunçu ümidləri doğrultmalıdır. Biz rəqibin oyununa uyğun komandanı təlimatlandırırıq. Ev tapşırıqları icra olunmursa, futbolçu bir müddətlik getməli və başa düşməlidir. Səmədov bir müddət sonra əsas komandaya qayıdacaq.

- Səmədov nə üçün əvəzedici komandadır?
- Verilən tapşırıqları icra etmədiyi üçün kənardadır. Mən heç kimi qapalı şəraitdə yola salmıram. Hər şeyi izah edirəm, nə üçün belə qərar verdiyimi özlərinə bildirirəm. Futbolçu meydana ürəklə girmirsə, deməli komandaya laqeyd yanaşır. Səmədov mənimlə görüşüb və ona hər şeyi izah etmişəm. Kapitan bir neçə dəfə eyni səhvləri edirsə, deməli nəyəsə çox arxayın olub.

- Millinin sabiq kapitanı kimi yığmanın son oyunlarındakı çıxışına münasibət bildirərdiz...
- Millidə kimisə saxlayanda, bizdən soruşmurlar. Biz söz sahibi deyilik. Hər halda, artıq De Byazi qalıbsa, ona uğurlar arzu etmək lazımdır. Millinin Avropa çempionatındakı qrupu daha çətindir. Fikrimcə, biz bu qrupda bircə Estoniyadan güclü ola bilərik.