Azərbaycan premyer-liqasının 27-ci turunda keçirilən "Sabah" - "Sumqayıt" matçından (2:2) sonra meydan sahibi komandanın baş məşqçisi Murad Musayev jurnalistlərin suallarını cavablandırdı.

"Football-plus.az" xəbər verir ki, o, əvvəlcə görüşlə bağlı fikirlərini bildirdi:

- Çoxlu emosiyalar var. Çalışıram obyektiv qiymət verim. Ola bilər ki, nəticəyə görə bir az təzyiq var. Komandaya irad bildirə bilmərəm. 9 nəfərlə qaldığımız vaxtda belə hücuma çıxdıq və hesabı bərabərləşdirdik. Bu gün lazımsız səhvlər buraxdıq. Komandada kimisə günahlandırmaq çətindi.

- Komandanın ilk hissədəki oyununu şərh edərdiz.

- Udduğumuz, heç-heçə oynadığımız oyundan sonra da mənə neqativ suallar verir. Komandada müsbət irəliləyiş görə bilmirsiz? Razıyam, rəqib ilk hissə kompakt oynadı. Xüsusilə, mərkəzdə boşluqlar tapmaq çətin idi. Daha çox cinahlardan asmalar edirdik. Mənim üçün çox qəribədir ki, yayda saat 5-də oynayırıq? Nə üçün daha rahat bir vaxtda oynamırıq? Bəhanə gətirmirəm.

- Amin Seydiyevin qırmızı vərəqə aldığı epizodla bağlı nə deyə bilərsiz?

- "Qırmızı"lıq epizod yox idi. Yenə də Amin ehtiyatlı oynamalı idi. Qol olsa belə, sərt oyundan qaçmalı idi.

- Sizə elə gəlmirmi ki, bu matçda qələbə qazana bilməməyinizdə psixoloji gərginliyin də rolu var idi?

- Əlbəttə, avrokuboklara vəsiqəyə görə gərginlik var idi. Tək psixoloji məsələ deyildi. Taktiki cəhətdən də səhvlər var idi. Çox istəyirdik ki, qələbə qazanaq. Hər şeyin Qəbələdə həll olunmasını istəyirdik. Uşaqlar indi paltardəyişmə otağında ağlayır. Heç kimi günahlandırmaq istəmirəm.

- Son konfranslarda jurnalistlərin suallarına aqressiv və replika ilə cavab verirsiz. Azərbaycanlı idman jurnalistlərini bəyənmirsiz?

- Baxın, biz "Qarabağ"la yaxşı oynayırıq. Sonra Elvin Camalovu pis oyunçu adlandırırlar. "Neftçi" ilə matçda böyük üstünlüklə oynayırıq, yenə sual verilir ki, Xaybulayev çox pis oynayır. Hər zaman ilk sual neqativ olur. Sizin işinizə hörmət edirəm. Peşənizin bir hissəsi sual verməkdir. Mən suallara cavab verməyə hazıram.