Misli premyer-liqasının 11-ci turunda keçirilən "Qəbələ" - "Kəpəz" matçından (1:1) sonra meydan sahibi komandanın baş məşqçisi Elmar Baxşıyev jurnalistlərin suallarını cavablandırdı.

"Footbal-plus.az" xəbər verir ki, o, əvvəlcə görüşlə bağlı fikirlərini bildirdi:

- Ağır oyun oldu. Çətin olacağını bilirdik. "Kəpəz" "Neftçi"yə qarşı da pis oynamadı. Komanda gözlədiyimdən aşağı səviyyədə çıxış etdi. Fasilədən sonra istədiyimizi edə bilmədik. Vacib xallar itirdik. Çalışıb, qarşıdakı oyunlara yüksək motivasiya ilə hazırlanmaq lazımdı.

- Komandada hər şey qaydasındadı?

- Ümumi götürəndə yalnız qol çatmır. Daha rahat olmağımız üçün imkanları dəyərləndirmək lazımdı. Hücumçular qol vurmayanda özlərinə inamı itirirlər. Heyətlə bağlı sıxıntılarımız var. Rövlan Muradov məcburiyyətdən müdafiədə oynayır. Üzərinə düşənin ən yaxşısını etməyə çalışır.

- Ehtiyat qüvvənin ümidləri doğrultmadığını deyə bilərik?

- Sonradan meydana daxil olanlar komandaya kömək etməyə çalışdı. Hücumameyilli oyunçularımız daha aqressiv olmalıdı. Sonluğu gətirə bilmirik.

- Emil Səfərovun enişi nə ilə bağlıdır?

- Yüngül zədəsi var. Tam oynaya bilmir.

- Ülvi İsgəndərovun zəif çıxışının səbəbi nədədi?

- Tək Ülvi deyil. Felipe Santos, Rafael Utziq, Omar Hani kimi oyunçularımız da var ki, neçə turdu, qol vura bilmirlər. Tək Ülvinin üstündə durmaq lazım deyil.

- Ürfan Abbasova növbəti oyunlarda şans verəcəksiz?

- Hələ tam sağalmayıb. Məşqlərə yeni başlayıb.