Misli premyer-liqasının III turunun "Sabah" - "Neftçi" matçından (2:1) sonra meydan sahibi komandanın baş məşqçisi Murad Musayev jurnalistlərin suallarını cavablandırdı.

"Footbal-plus.az" xəbər verir ki, o, əvvəlcə görüşlə bağlı fikirlərini bildirdi:

- Parlaq oyun gördük. Hər iki komanda mübarizə apardı. Kişi mübarizəsi oldu. Hər zaman "Neftçi" ilə oyunlarımız gərgin keçir. Qələbə qazanmaq istəyirik. Oyun bizim üçün mental cəhətdən də önəmli idi. Azarkeşlər adına da şadam. Yaxşı oyun gördülər.

- "Sabah"ın bu mövsüm çempionluq üçün mübarizə aparacağını deyə bilərik?

- Bu haqda düşünmürük. Əsas məqsədimiz qarşıdakı oyuna yaxşı hazırlaşmaqdır. Daha yaxşı oynamaq, inkişaf etmək lazımdır.

- 3 penalti oldu. Hər birini fərqli oyunçular yerinə yetirdi...

- Əsas penalti vuranımız Kristian Sebalyos idi. İkincidə meydanda yox idi. O olmadığı üçün Aleksey İsayev vurdu. Sonuncunu da Emmanuel Apeh vurdu. Çox istəyirdi, penaltini yerinə yetirsin.

- Rəqib baş məşqçi oyunu taktikada deyil, oyunçuların yanaşmasına görə uduzduqlarını dedi. Siz nə düşünürsüz?

- Əsas olan oyuna necə hazırlaşmaq və 90 dəqiqə necə mübarizə aparmaqdır. Taktika, texnika ikinci plandadır. Fərdi mübarizələrdə daha yaxşı idik. Döyüşməyimiz bizə bu qələbəni qazandırdı.

- Adətən belə oyunlarda motivasiya və psixoloji hazırlıq ön plana çıxır. Komandanı necə hazırlamışdız?

- Əlbəttə, bunun uzun hekayəsi var. İlk hissədən sonra uşaqlara sakit olmalarını tapşırdım. Əvvəlki oyunlarda "Neftçi"yə qarşı yaxşı oynasaq da, qələbə qazanmamışdıq. Bu dəfə isə alındı.

- "Qarabağ"ın "Viktoriya" ilə oyunu haqda proqnozlarınız nədir?

- "Viktoriya" aqresiv, sərt oyuna üstünlük verir. Öz meydanlarında da belə oynayacaqlarını düşünürəm. "Qarabağ"a soyuqqanlı olmağı arzulayıram. İnanıram ki, mərhələ adlaya biləcəklər, amma çətin olacaq. Qapalı komandalara qarşı oynamaq çətindir. İnanıram ki, "Qarabağ" lazım olan açarı tapa biləcək.

- Bu gün "Neftçi"dən hücum futbolu gözləyirdiz?

- "Neftçi" avrokubok matçlarında sürətli oyun göstərirdi. Əks-hücumlara yaxşı və tez çıxırdılar. Bu gün onların əsas silahlarından biri budu.

- 3 oyunun 2-də əcnəbi məşqçilərə qarşı oynamısız, birində isə yerli. Hansına hazırlaşmaq daha çətin olub?

- Fərqləndirməzdim. İlk iki oyun nisbətən daha asan oldu. Bu günkü matç çox çətin oldu.