"İntizamlı olmaq mənim hobbimdi" - Renat Dadaşov
Azərbaycan millisinin üzvü və "Qrasshopper"in yeni transferi Renat Dadaşov İsveçrə mətbuatına müsahibə verib.
"Footbal-plus.az" 20min.ch-ya istinadən xəbər verir ki, 24 yaşlı hücumçu yeni klubunda özünü yaxşı hiss etdiyini deyib: "İntizamlı olmaq mənim hobbimdi. Nə isə qaydasında olmayanda xoşuma gəlmir. Hər bir hücumçu qollar vurmaq istəyir. Mən də istəyirəm ki, qollarımla özümə və hər kəsə eyni Renat olduğumu göstərim. Hər məşqdə çox çalışırıq. Bacarığımızın 100 faizini ortaya qoyuruq. Komandamızdakı futbolçuların hamısı yaxşı oyunçulardı. Hazırda klubda hər şey yüksək səiyyədədi. Özümü yaxşı hiss edirəm".
Renat bunu da qeyd edib ki, yeniyetmə yaşlarından avtomobillərə böyük həvəs göstərsə də, indi belə deyil: "Əvvəllər avtomobillərə böyük həvəsim var idi. Lakin indi bu mövzuda fərqli düşünürəm. Üç il əvvəl sahib olmaq istədiyim avtomobillərin siyahısını tərtib etmişdim. Amma bunun lazımsız olduğunu bilirəm. Almaniyadakı maşınım hazırda təmir olunur, sonra İsveçrəyə gətiriləcək. Sürixdə böyük maşına ehtiyacınız yoxdu. Avtomobil məni yalnız gedəcəyim ünvana çatdırmaq üçün lazımdı".
Millimizin üzvü ailəsindən də danışıb: "Ailəmlə bağlarım möhkəmdi. İsveçrəyə gələndə ailəm iki dəfə mənə baş çəkib. Qardaşım Rüfət Dadaşov da peşəkar futbolçudu. Bir-birimizin oyunlarını izləyirik. Rüfət mənə çox ilham verir. Hər gün əlaqə saxlayırıq".
Qeyd edək ki, Renat Dadaşov mövsümün əvvəlində "Qrasshopper"lə 2+1 illik müqavilə imzalayıb. Onun qardaşı Rüfət Dadaşov isə "Şalke-2"də oynayır.
