“Turan Tovuz” 300 mövsümlük bilet satıb - AÇIQLAMA
“Turan Tovuz” Misli premyer-liqasının 3-cü turunda meydana çıxmayacaq.
Buna səbəb “Qarabağ”la qarşılaşmanın təxirə salınmasıdı. Həmçinin məlumdu ki, klub 500 ədəd mövsümlük bilet satışa çıxarıb. Hər bir azarkeş 59 manat ödəməklə komandanın çempionatda və kubokda keçirəcəyi ev oyunlarını izləyə bilər. Artıq 3-cü tur start götürüb. Maraqlıdı, mövsümlük biletlərin hamısı satılıb? Azarkeşlərin “Turan Tovuz”un növbəti matçlarını izləməsi üçün kartlar təhvil verilib?
Bu haqda məlumat almaq üçün Tovuz təmsilçisinin mətbuat katibi Süleyman Tağıyevlə əlaqə saxladıq:
“Bəli, artıq mövsümi biletlərin kartları gəlib. Birinci oyunda çatmadığına görə atributlar və kart olmadan 1 oyunluq bilet kimi vermişdik. İndi isə mövsümlük bilet alanların hamısına kartlar təqdim olunur. 500 biletdən, demək olar ki, 300-ü satılıb. Qalanlarının da satışı davam edir”.
Elitaya qayıdan iki komandadan biri olan “Turan Tovuz”un başqa həllini tapmayan problemi isə klubun rəsmi saytıdı. Klubdan verilən məlumatlarda ayın sonuna kimi saytın hazır olacağı bildirilirdi. “Kəpəz”in də saytı hazır deyil. Gəncə təmsiçisindən də saytın hazırlanması üçün işlərin getdiyi açıqlanmışdı. Bütün bunları nəzərə alaraq, hər iki klubun mətbuat katibi ilə əlaqə saxladıq.
Süleyman Tağıyev (Turan Tovuz):
“Saytda hazırda texniki məsələlər qalıb. Bir-iki xırda detal var ki, onun üzərində iş gedir. Dediyim məsələlər həllini tapandan sonra sayt istifadəyə hazır olacaq. Çox güman, avqustun sonuna, ən geci sentyabrın ilk həftəsinə kimi saytımız təqdim olunacaq”.
Azad Mustafayev (Kəpəz):
“Hazırda saytın üzərində iş gedir. Təxmini zaman deyə bilmirəm. Özüm də məyus oluram ki, bu məsələ yubanır. Amma bu istiqamətdə iş gedir”.
ŞAİR ABDULLA
