"Meydanda oksigen yox idi" - "Ferentsvaroş"un futbolçusu
"Ferentsvaroş"un (Macarıstan) futbolçusu Endre Botka Çempionlar Liqasının 3-cü təsnifat mərhələsində "Qarabağ"la Bakıda heç-heçə etdikləri ilk matç (1:1) barədə danışıb.
"Football-plus.az" xəbər verir ki, o, yerli mətbuata açıqlamasında Bakıdakı hava şəraitindən şikayətlənib: "Bir tərəfdən, stadionda görünəcək və hiss ediləcək dərəcədə tüstü var idi. Məncə, bu, ətrafda çox gördüyümüz manqallardan başqa heç bir yerdən çıxa bilməzdi. Çox çətin şəraitdə oynadıq. Qəribədi, əvvəllər belə şey yaşamamışdım. İstilik o qədər də güclü deyildi, amma nədənsə, meydanda oksigen yox idi. Havasız idi. Komanda yoldaşlarım və mən bunu isinmə hərəkətlərinə getdikdən cəmi iki dəqiqə sonra suyun bizdən sel kimi axmasından sonra hiss etdik. Bunu bəhanə etmirəm, rəqib də bizimlə eyni şəraitdə oynadı. Sadəcə, onlar rütubətli havaya daha çox öyrəşiblər".
Qeyd edək ki, avqustun 9-da "Qroupama Arena"da oynanılacaq "Ferentsvaroş" - “Qarabağ” cavab görüşü Bakı vaxtı ilə saat 22.00-da başlayacaq.
Digər xəbərlər
