Region Liqasından 1-ci diviziona 3 komanda - “Araz-Naxçıvan”, “Mingəçevir”, və “İmişli” yüksəldi.

Lakin AFFA-nın İcraiyyə Komitəsinin son iclasında verilən qərara görə, daha bir Region Liqası təmsilçisinin divizionda iştirakı təmin olunmalı idi. Bunun üçün isə AFFA və PFL tərəfindən meyarlar müəyyən edildi. Meyarlara uyğun sənədləri quruma ən tez təqdim edən komandanın növbəti mövsümdən 1-ci divizionda çıxışı təmin olunacaqdı.

Bununla bağlı 6 komanda AFFA-ya müraciət etmişdi. Bunlar “Qobustan”, “Ağsu Siti”, “Füzuli”, “Göyəzən”, “İrəvan” və “Bakılı”dı. Lakin bu gün açıqlanan qərara görə 6 klubdan heç biririnin 1-ci divizionda iştirakı təmin olunmayıb. Səbəb isə təqdim olunan sənədlərin meyarlara uyğun olmamasıdı.

Görəsən, komandalar hansı meyarlara cavab verməyib? Onların qərara münasibəti necədi? “Füzuli”nin baş məşqçisi Vasif İsmayılov məsələ ilə bağlı “Football-plus.az” saytına danışdı:

“Rəhbərliyin qərarıdı. Yəqin ki, hardasa düzgün olmayan bir şey olub. Meyarlara cavab vermişdik. Ola bilər ki, hansındasa natamamlıq olub. Bunun əsasən stadionla bağlı olduğunu düşünürük. Biz Horadiz Olimpiya İdman Kompleksini göstərmişdik. Qərar əslində bizim üçün gözlənilməz olmadı. Sadəcə, AFFA-nın daha bir klubu 1-ci diviziona buraxmaqla bağlı qərarı bizim üçün fürsət idi. Ona görə istədik ki, şansımızdan istifadə edək. Hazırkı vəziyyətdə isə əsas məqsədimiz Region Liqasının növbəti mövsümündə yüksək səviyyədə çıxış etməkdi”.

ŞAİR ABDULLA