Altı klubu birinci diviziona buraxmayan AFFA problemin həllini tapdı – RƏSMİ AÇIQLAMA
AFFA-nın İcraiyyə Komitəsinin iyulun 15-də keçirilən iclasında Region Liqasında mübarizə aparan komandalardan birinin birinci divizionda çıxış etməsi ilə bağlı qərar qəbul olunmuşdu.
Qərarda o da qeyd edilmişdi ki, AFFA və PFL tərəfindən müvafiq meyarlar müəyyənləşdirlsin və bu tələblərə cavab verən, ilk müraciət edən komanda aşağı dəstrədə çıxış etsin.
Ancaq bu mümkün olmayacaq. Məsələ ilə bağlı AFFA-nın rəsmi saytında xəbər yerləşdirilib: “AFFA-nın İcraiyyə Komitəsinin 15 iyul 2022-ci il tarixli iclasında qəbul olunan müvafiq qərara əsasən, Region Liqası komandalarının birinci divizionda çıxış edə bilməsi üçün AFFA və PFL tərəfindən müvafiq meyarlar müəyyənləşdirilib, 18 iyul 2022-ci il tarixində ictimaiyyətin diqqətinə çatdırılıb. Bununla əlaqədar iyulun 25-dək (müraciətlər üçün müəyyənləşdirilən son tarix) "Füzuli", "Ağsu Siti", "Göyəzən", "İrəvan", "Qobustan" və "Bakılı" klubları tərəfindən AFFA-ya müraciətlər ünvanlanıb və müvafiq qaydada araşdırılıb. Sənədlərə baxış keçirilərkən heç bir müraciətin AFFA və PFL tərəfindən təqdim olunan meyarlara uyğun gəlmədiyi müəyyən olunub. Beləliklə, tələb olunan meyarlara uyğun şəkildə sənədlər təqdim olunmadığı üçün müraciət edən klubların 2022/23 mövsümündə birinci divizionda çıxışı təmin olunmayacaq”.
AFFA-nın Mətbuat və İctimaiyyətlə Əlaqələr Departamentinin rəhbəri Firuz Abdulla “Football-plus.az”a açıqlamasında aşağı dəstədə komanda sayında dəyişiklik olmayacağını söylədi: “Birinci divizionda 2022/23 mövsümü indiyə qədər təsdiq olunan klubların iştirakı ilə keçiriləcək”.
RƏŞAD
Digər xəbərlər
