Stenli kuboku uğrunda final seriyası 6-cı oyunda bitdi.

Halbuki son iki mövsümün qalibi “Tampa-Bey” səfərdə keçirdiyi 5-ci oyunda “Kolorado”ya qalib gəlməklə fərqi minimuma endirmiş və azarkeşlərində növbəti geridönüşlə bağlı ümid yaratmışdı. Bu dəfə olmadı, “Kolorado” 6-cı oyunda işi bitirdi. “Evelanş”ın qələbəsi bir maraqlı statistikanın da təkrarı deməkdi. Belə ki, bu komanda finala çıxdısa, mütləq çempion olur. Əvvəlki çempionluqlar 1996-cı və 2001-ci illərə təsadüf etmişdi.

Başqa maraqlı məqamlar da var. “Kolorado”nu çalışdıran Cared Bednar Şimali Amerika hokkeyində aşağıdan yuxarı bütün liqaları qazanan ilk mütəxəssis kimi tarixə düşdü. 2016-nın avqustundan bu komandanın “sükanı arxasında” olan 50 yaşlı kanadalı Kelli Kubokunu (ECHL) və Kolder Kubokunu (AHL) da qazanıb.

Mükafatlandırma mərasimində “Kolorado”nun kapitanı Qabriel Landeskuqa Stenli kubokunu MHL-in komissarı Qeri Bettmen yox, onun köməkçisi Bill Deyli təqdim etdi. Bununla da 1993-cü ildən bəri davam edən ənənə pozuldu. İş ondadı ki, komissarın koronavirus testi müsbət çıxıb.

2013-cü ildən bəri “Kolorado”nun baş meneceri kimi çalışan Co Sakik də bu çempionluq sayəsində tarixə düşdü. 1996-cı və 2001-ci illərdə çempion komandanın kapitanı olan Sakik həm hokkeyçi, həm də baş menecer kimi bunu bacaran 8-ci adamdı. Ona qədər Eddi Jerar, Lester Patrik, Art Ross, Cek Adams, Serj Savar, Bob Geyni və Brayan Maklellan iki statusda çempion olmuşdu.

Reaksiyalar

Nazem Kadri, “Kolorado”nun forvardı: “Mövsümün ilk günündən azarkeşlərim var idi, onlar heç vaxt bacarığıma şübhə etməyib. Məni pley-offda yük sayanlar isə ... öpə bilər. Aydın məsələdi ki, əlim sınandan sonra bədgümanların sayı artmışdı. Amma mən döndüm və özümü göstərdim. Əslində bütün bunlar yuxuya bənzəyir. Qeyri-adi, inanılmaz mənzərədi”.

Qabriel Landeskuq, “Kolorado”nun kapitanı: “20 ildən artıq müddətdə, sadəcə, bu hədəfi arzuladıq, istədik və onun uğrunda çalışdıq. Nəhayət, mümkün oldu. Bu komanda möhtəşəmdi - ən yuxarıdan başlayaraq masajçılarımıza, xanımlarımıza, azarkeşlərimizə, stadionda çalışan hər kəsə qədər. Baş menecer Co Sakik böyük iş görüb, elə oyunçular seçib ki, komandamızı çətin rəqibə çevirib. Bütün bu oğlanlara baxın, qələbə yolunda hər şey etməyə hazır idilər”.
Cared Bednar, “Kolorado”nun baş məşqçisi: “Təsəvvürə gəlməyəcək emosiyalarım var. Bu uşaqların etdiklərinə görə xoşbəxtəm, onlarla qürur duyuram. Final sirenası səslənəndə gözlərimə inanmırdım. Çox maraq doğuran qələbə səyahət idi, bu yolun bir hissəsi olduğuma görə Tanrıma minnətdaram”.

Con Kuper, “Tampa-Bey”in baş məşqçisi: “Pley-off seriyası bitsə də, bu bizim üçün yolun sonu deyil. Adətən, qalib gələ bilməyən komandaları tez-tez xatırlamırlar, ancaq düşünürəm ki, bu komanda hamının yadında qalacaq. Kaş paltardəyişmə otağında yaşananları görəydiz. Heç vaxt belə mənzərə görməmişdim, heç bir başqa komanda ilə bu qədər qürur duymamışam. Bu gün qalib gəlməsək də, bu uşaqları həmişə xatırlayacam. Əlbəttə, bu məğlubiyyət bizim üçün qorxuncdu”.