Qərb konfransının qalibi “Kolorado” finalda rəqibini gözləyir.

Şərq konfransında isə final seriyasının 5-ci oyunu arxada qaldı. “Tampa-Bey” “Reyncers”ə ilk iki oyunda uduzmaqla azarkeşlərini məyus etmişdi. Amma Stenli kubokunun son sahibi növbəti üç oyunda vəziyyəti düzəltdi və artıq önə çıxıb.

Rusiyanın fevralın 24-də “xüsusi hərbi əməliyyat” adı altında Ukrayna ərazisinə soxulduğunu bilirsiz. Təcavüz şimal qonşumuzun idmançılarına baha başa gəlməkdədi. MHL komissarı Bill Deyli Stenli kubokunun mövsümlərarası dövrdə Rusiyaya aparılması ehtimalı ilə bağlı sualı belə cavablayıb: “Dünyadakı indiki vəziyyəti nəzərə alsaq, MHL-in Stenli kubokunun Rusiyaya “səyahət etməsinə” icazə verəcəyi ehtimalı hədsiz aşağıdı”.

Xatırladaq ki, “Kolorado”nun heyətində rusiyalı hücumçu Valeri Niçuşkin çıxış edir. “Reyncers”lə (İqor Şestyorkin, Artemi Panarin, Aleksandr Georgiyev) “Tampa-Bey”in (Andrey Vasilyevski, Mixail Serqaçev, Nikita Kuçerov) heyətində də ruslar var. MHL-də ənənə belədi ki, Stenli kubokunun qalibi olan komandanın hər hokkeyçisi bu qəniməti bir neçə gün evində saxlaya bilər.

Bu arada Kanadanın Kalqari şəhərinin meri Coti Qondek verdiyi sözü tutaraq, şəhər şurasının iclasında “Edmonton”un formasını geyib. O, Edmontonun meri ilə mərcə girmişdi. Mərcin mahiyyəti bundan ibarət idi ki, uduzan tərəfin təmsil etdiyi şəhərin şura üzvləri seriya bitəndən sonra keçiriləcək ilk iclasda qalib komandanın formasını geyməliydilər. Qondek həmçinin iclası sifətində “Edmonton”un emblemi təsvir olunmuş halda keçirib. Xatırladaq ki, Qərb konfransında pley-offun 2-ci mərhələsində “Edmonton” “Kalqari”ni 4:1 hesabıyla məğlub edib.

Konfrans finalı

10 iyun

Reyncers – Tampa-Bey 1:3 (0:0, 1:1, 0:2)

Seriyada hesab – 2:3.