Ölkəmizi Çempionlar Liqası və Konfrans Liqasında təmsil edəcək klublarımızın rəqiblərinin adlarına aydınlıq gəldi.

"Qarabağ" Polşa çempionu "Lex", "Neftçi" Cənubi Kiprin "Aris", "Qəbələ" Macarıstanın "Fehervar", "Zirə" isə İsrailin "Makkabi" (Təl-Əviv) klubu ilə qarşılaşacaq.

"Football-plus.az" saytı olaraq klublarımızın şanzınə dəyərləndirməsi üçün Ağasəlim Mircavadovla əlaqə saxladıq:

"Çoxları heyfslənir ki, bizə çox çətin rəqiblər düşüb, şansımız azdı. Mətbuatda da belə pessimist fikirlər "göz oxşayır". Hər zaman demişəm, yenə təkrar edirəm, avrokuboklarda zəif rəqib olmur. Kimin yatsa yuxusuna gələrdi ki, "Şerif" dünyanın ən varlı və güclü klublarından "Real"ı məğlub edəcək?!
"Lex" Polşanın ən köklü klublarındandı. Dəfələrlə ölkə çempionu və kubokun qalibi olmaqla, avrukobokların qrup mərhələsində oynayan, hətta qrupdan çıxmağı bacaran komandadı. Amma bu bizi və bütün "Qarabağ"sevərləri qorxutmamalıdı.u Ağdam təmsilçisinin öz oyun fəlsəfəsi və avrokuboklarda böyük təcrübəsi var. Odu ki, Qurban Qurbanovun yetirmələrinin meydanda özlərinə xas oyunlarını göstərib uğur qazanacaqlarına inanır, onlara uğurlar arzu edirəm.

Konfrans Liqasında çıxış edəcək komandalardan ən acınacaqlı durumda olanı "Neftçi"di. Komanda 1 aydan sonra avrokubok oyununa çıxacaq, amma baş məşqçinin kimliyinə və heyətlə bağlı suallara aydınlıq gəlməyib. Ölkənin köklü klubunda qeyri-müəyyənliyin olması xoş deyil. "Neftçi" daim xalqımızın, dövlətimizin fəxri olub. Rəhbərlik Samir Abasov göndərcəkdisə, gərək əvvəlcədən onun yerinə namizəd tapardı. Yoxsa gah Vernidubu komandaya gətirir, gah Qonçarenko ilə danışıqlar aparırlat. İndi də mətbuatdan oxuyuram ki, "Traktor"da çalışmış Ərtoğrul Sağlamı gətirmək istəyirlər. Yəni, klub rəhbərliyi qeyri-peşəkarlığıyla diqqət çəkir. Tarixi komandamıza belə münasibət ölkə futboluna zərbədi.

"Zirə"yə də güclü rəqib düşüb. Komandanın əsas "vuran ayağı" Davit Volkovun ayrılmasını böyük itki sayıram. Tezliklə onun yerini dolduracaq forvard tapılmalıdı. Rəşad Sadıqovun həm futbolçu, həm də məşqçi kimi bacarığını yaxşı bilirik. Odu ki, "qartallar"ın sona qədər döyüşəcəklərinə əminəm.

"Qəbələ"nin rəqibi "Fehervar"a gəlincə, Macarıstan futbol ölkəsidi. Onlar futbolda üstünlüklərini həmişə göstərməyə çalışıblar. Amma "Qəbələ" də özünə görə ağırlığı olan klubdu. Komandanın avrokubok təcrübəsi var. Blgə təmsilçisi ölkə çempionatındakı performansını Konfrans Liqasında da göstərsə, düşünürəm ki, mərhələ adlayacaq".

ABDULLA İSMAYILOĞLU