Bu il ölkəmizi avrokuboklarda təmsil edəcək klublar bəllidi.

“Qarabağ” Çempionlar Liqasında, “Neftçi”, “Zirə” və “Qəbələ” isə Konfrans Liqasında mübarizə aparacaq.

“Football-plus.az” saytının məlumatına görə, Ağdam təmsilçisi Çempionlar Liqasının səpələnmişlər səbətində yer alıb və yarışa 1-ci təsnifat mərhələsindən başlayacaq. Qalan komandalarımız isə mübarizəyə Konfrans Liqasının 2-ci təsnifat mərhələsindən qoşulacaq.

Görəsən, təmsilçilərimiz oyunlarını hansı stadionda keçirəcək? Bu suala cavab tapmaq üçün klublarla əlaqə saxladıq.

“Qarabağ”ın mətbuat katibi Gündüz Abbaszadənin sözlərinə görə, “köhlən atlar” bütün oyunlarını Tofiq Bəhramov adına Respublika stadionunda keçirəcək. “Neftçi”nin mətbuat katibi Rüstəm Allahverdiyev komandanın rəqiblərini “Bakcell Arena”da qəbul edəcəyini bildirdi. “Zirə” isə hələ stadion seçimini etməyib. Mətbuat katibi Elmar Abdullazadənin sözlərinə görə, bu məsələ kubokun final oyunundan sonra dəqiqləşəcək. “Qəbələ” isə ilkin mərhələnin görüşlərinə doğma meydanda çıxacaq. Klubun mətbuat katibi Anar Hacıyev növbəti mərhələ matçları üçün “Dalğa Arena”nın sifariş verildiyini də diqqətə çatdırdı.

ŞAİR ABDULLA