Bir neçə gün öncə Bakı Olimpiya Stadionunda (BOS) AFFA İcraiyyə Komitəsinin növbəti iclası keçirilib.

Gündəlikdəki məsələlərin müzakirəsindən əvvəl qurumun prezidenti Rövnəq Abdullayev BOS-da yaradılan VAR Mərkəzi ilə tanış olub. Ona mərkəzin iş prinsipi ilə bağlı məlumat verilib. Abdullayev daha sonra FİFA-nın Avropa Milli Assosiasiyaları üzrə direktoru vəzifəsinə təyin olunan icraçı vitse-prezident Elxan Məmmədova İcraiyyə Komitəsi adından uğurlar arzulayıb.

Müzakirələrdən sonra aşağıdakı qərarlar qəbul olunub:

1. 2022/23 mövsümündən etibarən "İmişli", "Mingəçevir" və "Araz Naxçıvan" 1-ci divizionda çıxış etsin.
2. Azərbaycan çempionatında legioner limitinin “6+5” sistemi ilə tətbiqi davam etdirilsin.
3. Premyer-liqada gənc futbolçular üçün yaş limiti ləğv olunsun.
4. Azərbaycan çempionatında əvəzetmə sayı dəyişdirilməsin (3 əvəzetmə saxlanılsın).
5. 2022/23 mövsümündən etibarən klublar sifariş ərizəsinə 14 legioner futbolçu daxil edə bilər. 14 legionerdən əlavə hər legioner üçün sifariş ödənişi 50 min manat müəyyənləşdirilsin.
6. 2023/24 mövsümündən etibarən klublar sifariş ərizəsinə 12 legioner futbolçu daxil edə bilər. 12 legionerdən əlavə hər legioner üçün sifariş ödənişi 50 min manat müəyyənləşdirilsin.
7. AFFA-nın Yoxlama və Təftiş Komitəsinin Əsasnaməsinin hazırlanması baş katibliyə tapşırılsın. Əsasnamə 1 ay ərzində İcraiyyə Komitəsinə təqdim olunsun.

Müzakirələrin gedişatı və qəbul olunan qərarlar ilə bağlı AFFA-nın vitse-prezidenti, Məşqçilər Komitəsinin rəhbəri Vaqif Sadıqovla danışdıq.

- Əksəriyyətin təxmin etmədiyi bir qərar qəbul olundu. Təbii ki, gənc futbolçu limitinin ləğvini nəzərdə tuturuq. Sizcə, bu dəyişiklik U-21 yığmamıza necə təsir göstərəcək? Nəzərə alaq ki, bu tələb 10 ilə yaxındı icra olunurdu.

- Necə təsir edəcəyini zaman göstərəcək. Amma biz 2012-ci ildən etibarən bu limiti tətbiq edirdik. İstədiyimiz nəticəni ala bilmədiyimizə görə belə qərar qəbul olundu. Klublar Komitəsinin sədri də İcraiyyə Komitəsinin üzvlərinin önündə çıxış edərkən klubların xahişlərindən birinin də gənc oyunçu limitinin ləğvi ilə bağlı olduğunu bildirdi. Bu məsələni çox götür-qoy etdik. Bildiyiniz kimi, premyer-liqada əlavə iki, divizionda isə üç komanda çıxış edəcək. Buna görə də belə qərara gəldik ki, gənc futbolçular özlərini göstərmək imkanı əldə edəcəklər. Rəqabətə dözümlü oyunçular yetişəcək.

- Əvəzetmə sayı dəyişmədi, 3 olaraq qaldı. Halbuki siz qəzetimizin ötən sayında bu rəqəmin 5 olmasının tərəfdarı olduğunuzu demişdiz…

- Bu məsələ ilə bağlı xeyli müzakirə oldu. Sonda komandalar arasında balansın pozulmaması üçün 3 əvəzləməni saxladıq. Çünki bəzi geniş heyətə malik klublar bundan istifadə etməklə gücünə güc qata bilər. Lakin başqaları ehtiyatda olan futbolçuların səviyyəsinə və sayına görə çətinlik çəkir. Mövzu ilə bağlı çox təklif irəli sürüldü. Onlardan biri də əvəzetmə sayının 5 və meydana çıxacaq futbolçulardan birinin 21 yaşadək olması idi. Amma bu qəbul edilmədi. Əvvəldə də bildirdiyim kimi, gənc oyunçunun ehtiyatda oturub bir neçə dəqiqəlik meydana çıxacağını gözləməkdənsə, diviziona və premyer-liqaya yeni qatılacaq klublarda oynaması daha məqsədəuyğundu. Bu balansı pozmamaq üçün qərar qəbul etdik ki, hələlik 3 əvəzetməni qoruyaq.

- Region Liqasından 1-ci diviziona “Araz Naxçıvan”, “İmişli” və “Mingəçevir” gəldi. Bu klublar hansı meyarlara görə seçilib? Niyə məhz bu üçü?

- Bildirilmişdi ki, Region Liqasında ən az 3 il çıxış edən klublar 1-ci diviziona buraxılacaq. Bu meyar əsasında müzakirə aparıldı və bu 3 komanda seçildi.
- Bu klublara 1-ci divizonda çıxış etmələri üçün AFFA tərəfindən maddi yardım göstəriləcək?

- Qeyd edim ki, “Araz Naxçıvan”ın bütün xərcləri özünün qarşılayacağı bildirildi. Ancaq “İmişli” və “Mingəçevir” AFFA-dan maddi dəstək alacaq.

- “Araz Naxçıvan”ın yol xərcləri necə? Bunu da klub özü qarşılayacaq?

- Bəli. Klubun rəhbəri komandanın bütün xərclərini üzərinə götürdüyünü söylədi.

- Diviziondan premyer-liqaya gələcək klublarla bağlı müzakirə oldu?

- Xeyr. Çünki Lisenziyalaşdırma Komissiyasının cavabı hələ elan edilməyib. Ona görə də bu mövzuya toxunulmadı. Qərardan sonra bu məsələ dəqiqələşəcək.

SƏNƏM FƏRHADOVA