“Mersedes” səhvini birinci etiraf edəcək”
“Formula-1” üzrə dünya çempionatında ilk iki mərhələ arxada qalıb.
Aprelin 10-da Melburn mərhələsi baş tutacaq. Bugünlərdə avtoidman dünyasından maraqlı xəbərlər gəlməkdədi.
“Haas”ın pilotu Mik Şumaher rusiyalı Nikita Mazepin komandanı tərk edəndən sonra düşərgədə hökm sürən əhval-ruhiyyədən danışıb:
“Bəli, komandada müəyyən dəyişikliklər baş verib. Deyərdim ki, daha rahatıq. Maqnussenlə yaxşı münasibətlərimiz yaranıb, hər şey əladı. Bəzən mən daha sürətli oluram, bəzən Kevin məni qabaqlayır. Birgə işləyir, nədə tərəqqi etməli olduğumuzu bilirik”.
Xatırladaq ki, Mazepin 2021 mövsümündə Şumaherlə birgə çıxış edib. Ancaq Rusiyanın Ukraynaya təcavüzü üzündən 2022 mövsümü ərəfəsində Amerika komandası rus pilotla müqaviləni pozub. Onun yerini Kevin Maqnussen tutub.
“Formula-1”in texniki sistem direktoru Rob Smedli də maraqlı açıqlama verib. O, komandaların yeni bolidləri haqda danışıb:
“Mersedes” səhvini birinci etiraf edəcək. “Ferrari” özünü çox yaxşı göstərdi və “Red Bull” ilə birgə liderlər sırasındadı. Ancaq mövsümün gedişində istənilən başqa illə müqayisədə daha ciddi dəyişikliklərin olacağını gözləyirəm. Komandalar ən müxtəlif aspektlərdə “artırmağa” çalışmaqla sürəti tapacaq. Həmişə kimlərsə düzgün qərarlar verir, kimlərsə səhv edir. Sözsüz, “Formula-1” rəhbərliyi tam yeni reqlamenti tətbiq edəndə qüvvələr nisbətinin dəyişəcəyini gözləyirdi. Ancaq təkcə qüvvələr nisbəti dəyişmədi – mövsümün gedişindəki təkamülü də görürük”.
Bildiyiniz kimi, ilk iki mərhələdən sonra “Mersedes” Mühəndislər kubokunda 38 xalla 2-ci yerdədi. Zirvədə “Ferrari” (78 xal) qərarlaşıb, liderlər “üçlüy”ünü “Red Bull” (37 xal) qapayır.
Ötən ay Maks Ferstappenlə “Red Bull” müqavilə müddətini daha 7 il – 2028-ə qədər uzatmışdı. Bu, müasir “Formula-1” dünyasında ən uzunmüddətli müqavilədi. “Red Bull”un idman məsləhətçisi Helmut Marko etiraf edir ki, komanda total uğursuzluğa düçar olarsa, Ferstappen müqaviləni vaxtından əvvəl poza bilər:
“Müqavilədə 2014-dəki uğursuzluğa bənzər hadisə baş verəcəyi təqdirə əməkdaşlığın dayandırılmasının mümkünlüyü nəzərdə tutulub. Onda mühərrikin gücü baxımından “Mersedes”ə müqavimət göstərmək üçün heç bir şansımız yox idi”.
“Alfa Romeo”nun pilotu Vallteri Bottas isə sabiq komanda yoldaşı Lüis Hemiltonla münasibətləri haqda danışıb:
“Artıq komanda yoldaşı olmasaq da, hələ də dostuq. Münasibətlərimiz yaxşıdı. Ona görə ki, komanda yoldaşı olarkən birlikdə çox şey qazanmışıq. Düşünürəm ki, dostluğumuzun ömrü uzun olacaq. Bəhreyn mərhələsindən sonra onu fəxri kürsüdən görərkən əlimi yellədim, Lüis də eyni şəkildə cavab verdi. Sonra birlikdə Dubaya uçduq. Dubaydan da Səudiyyə Ərəbistanın yollandıq. Yəni hələ də birgə uçuruq. Hansısa mənada heç nə dəyişməyib”.
Fin pilot 2021 mövsümü başa çatandan sonra “Alfa Romeo”ya keçib, ona qədər isə 5 il “Mersedes”in şərəfini qoruyub.
Digər xəbərlər
