“Red Bull” “Mersedes” yox, “Ferrari” ilə rəqabəti bəyənir
“Formula-1” üzrə dünya çempionatının yeni mövsümdə hələ yalnız iki mərhələ arxada qalıb.
Komanda rəsmilərinin və pilotlarının açıqlamalarının ardı-arası kəsilmir.
Volff narazıdı, Marko razı
İlk iki mərhələdən sonra 38 xalla komanda hesabında 2-ci pillədə qərarlaşan “Mersedes”in rəhbəri Toto Volff Səudiyyə Ərəbistanı “Qran-pri”sinə belə yekun vurub:
“Rassell 5-ci, Hemilton 10-cu oldu. Sakitləşmirik və dincəlməyə yollanmırıq, titul uğrunda mübarizəyə dönməliyik. İndi maşın istədiyimiz kimi çalışmır. Ümid edirəm ki, əslində gerilik sonuncu yarışda gördüyümüz qədər böyük deyil. Ancaq bu da var ki, rəqiblərə hər yerdə uduzuruq”.
“Red Bull”un məsləhətçisi Helmut Marko isə “Ferrari” ilə titul uğrunda mübarizədən danışarkən “Mersedes”in də bostanına daş atıb:
“Bu yeni qarşıdurmadı. “Mersedes” indi minimum yarım saniyə geridədi. Hərçənd kim bilir – onlar problemlərini həll edə bilərlər. Ancaq biz də yatmııq, bolidin inkişafı yolunda yorulmadan çalışırıq. Düşünürəm ki, Lekler və “Ferrari” ilə yarışmaq daha xoşdu, nəinki “Mersedes”lə. İndi idman baxımından daha üst səviyyədə rəqabət gedir. Aydındı ki, yalnız iki mərhələ arxada qalıb, ancaq “Mersedes”lə rəqabətdə yaşanan mənzərənin təkrarlanacağına inanmıram”.
Xatırladaq ki, “Red Bull”un pilotu Maks Ferstappen Ciddədə “Ferrari”nin pilotu Şarl Lekleri arxada qoymaqla qalib olub.
Qaslinin qarnı ağrıyırmış...
“Alfa Tauri”nin son mərhələni 8-ci yerdə bitirən pilotu Pyer Qasli də maraqlı açıqlama verib. O, yarış vaxtı üzləşdiyi çətinliklərdən və …qarınağrısından danışıb:
“Deməliyəm ki, heç də razı qalmadım. Boksa baş çəkərkən bəxtim gətirmədi. Pit-leyndən çıxan kimi təhlükəsizlik maşını peyda oldu və mən 14-cü pilləyə yuvarlandım. Son nəticədə 8-ci yerə yüksəldim, odu ki, müəyyən mənada razıyam. Son 15 dövrə karyeramın ən ağrılı anları idi. Bağırsağlarıma nə olduğunu bilmirən, ancaq maşında az qala ölürdüm. Ağrıdan qışqırırdım, sadəcə, yarışın bitməsini istəyirdim. Hər döngədə içim doğranırdı. Heç də xoş deyildi. Artıq həkimə baş çəkmişəm, ancaq ağrının səbəbini bilmirəm”.
Doğrudan da, həkimlər təcili müdaxilə tələb edən hansısa səbəb tapmayıb. Bütün başqa pilotlar kimi, Qasli də aprelin 10-da keçiriləcək Avstraliya mərhələsinə hazırlaşır.
Digər xəbərlər
