Fanatlarının Rusiya prezidenti Vladimir Putinin lehinə tezahürat səsləndirməsi üzündən UEFA-nın ''Fənərbaxça''ya verdiyi cəza məlum olub.

"Football-plius.az" xəbər verir ki, İstanbul nəhəngi avrokuboklarda növbəti ev oyununda ən azı 5 min azarkeşdən məhrum olacaq. Yəni 5 min biletin satılmasına qadağa qoyulub. Amma bu cəza şərti xarakter daşıyır və yalnız qarşıdakı iki il ərzində eyni hadisə təkrarlanacağı təqdirdə qüvvəyə minəcək.

Para cəzası isə şərti yox real xarakter daşıyır. ''Sarı-lacivərdlilər''ə 50 min avro para cəzası da verilib. Xatırladaq ki, sözügedən hadisə Çempionlar Liqasının 2-ci təsnifat mərhələsi çərçivəsində Kiyev ''Dinamo''suna qarşı ev oyununda baş vermişdi. Kiyevlilərin baş məşqçisi Mirça Luçesku bu hadisəyə etiraz əlaməti olaraq oyunsonrası mətbuat konfransını boykot etmişdi.