Bilindiyi kimi, çərşənbə günü yeni mövsüm üçün avrokubokların təsnifat mərhələlərinin ilk püşkatma mərasimi keçirildi.

Türkiyə təmsilçilərinin də rəqibləri bəlli oldu. Mövsümü uyğun olaraq, 3 və 4-cü pillədə başa vurmaqla Konfrans Liqasının 2-ci təsnifat mərhələsində oynamaq haqqı qazanan ''Konyaspor''la ''İstanbul BŞ''nin rəqibləri artıq məlumdu. Daha öncə 2016/17 və 2017/18 mövsümlərində AL-in qrup mərhələsində oynayan, yəni 4 illik fasilədən sonra avrokuboklara qayıdan Konya təmsilçisi Belarus təmsilçisi BATE ilə qarşılaşacaq. Son 8 ildə 7-ci dəfə avrokuboklarda oynayacaq ''İstanbul BŞ'' isə Netanya ''Makkabi''si ilə oynayacaq. İlk oyunlar iyulun 21-də, cavab görüşləri iyulun 28-də keçiriləcək.

''İstanbul BŞ''nin ilk görüşü səfərdə keçirəcəyi dəqiqdi. Amma Konya klubunun durumu fərqlidi. Bilindiyi kimi, siyasi məsələlər üzündən UEFA Belarus klublarının avrokubok matçlarını evdə keçirməsınə qadağa qoyub. Bu üzdən ''Konyaspor'' qarşı tərəfə hər iki oyunu Konyada keçirməyi təklif edib. BATE rəsmiləri bu təklifi qəbul ediblər. İki klub öz aralarında anlaşmaya vardığından UEFA da duruma müdaxilə etməyib. Beləliklə, ''Konyaspor'' - BATE duelində hər iki oyun Konyada keçiriləcək!

Futbolsevərlərin daha çox maraq göstərdiyi Çempionlar Liqasında bu mövsüm Türkiyəni təmsil edəcək iki klubdan biri olan ''Fənərbaxça''nın da rəqibi məlumdu. Ötən mövsümü 2-ci pillədə bitirməklə ÇL-in 2-ci təsnifat mərhələsində oynamaq imkanı qazanan ''Fənər'' Kiyev ''Dinamo''su ilə qarşılaşacaq.

İlk oyun iyulun 19-20-də reqib meydanında, ikinci oyun iyulun 26-27-də İstanbulda keçiriləcək. Qeyd edək ki, Ukraynada baş verən məlum hadisələr üzündən Mirça Luçeskunun çalışdırdığı ''Dinamo'' ev oyununu Polşada keçirəcək. ''Fənər'' bu dueldən məğlub ayrılacağı təqdirdə mübarizəni AL-in 3-cü təsnifat mərhələsində davam etdirəcək. Jorje Jezuşun kollektivi rəqibini üstələyəcəyi halda növbəti mərhələdə ''Monako'', ''Şturm'', Belçika təmsilçisi ''Union'' və ya “Midtyullann” - AEK cütünün qalibi ilə qarşılacaq. Xatırladaq ki, Jezuş ötən mövsüm ÇL-in qrup mərhələsində ''Benfika''nın başında kiyevlilərlə üz-üzə gəlmişdi. Həmin vaxt Kiyevdəki görüş qolsuz başa çatmışdısa, Lissabonda meydan sahibləri 2:0 hesabı ilə üstün olaraq bu rəqibdən 2 oyuna 4 xal qoparmışdılar. Bir dönəm Ukrayna yığmasını çalışdırmış, ''Dnepr''i AL-in finalına daşımış Miron Markeviç bu cütdə həmyerlilərini aşkar favorit adlandırıb: ''Fənərbaxça''nın ''Dinamo''ya problem yaradacağını düşünmürəm. Düzdü, türklərin çox ciddi tribuna dəstəyi olacaq. Amma futbolu tribunalar oynamır. Püşkün nəticəsini ''Dinamo'' üçün normal saymaq olar. Ötən mövsüm türklərin bəzi oyunlarını izləmişdim. Heyətlərində yaşlı oyunçuların sayı çoxdu. Onların ''Dinamo'' ilə oyuna qədər tam hazır olacaqlarını düşünmürəm. Kiyevlilərin mərhələni keçmək şansı daha çoxdu''.