Misli premyer-liqasının 35-ci turunda “Turan Tovuz” “Qarabağ”a 3:4 hesabıyla məğlub olub.

“Football-plus.az” xəbər verir ki, matçdan sonra qərblilərin baş məşqçisi Ayxan Abbasovun mətbuat konfransı keçirilib. Sizi mütəxəssisin fikirləri ilə tanış edirik:

- Rəqibin 4-cü qolundan öncə qayda pozuntusu olduğu görünürdü. Siz necə düşünürsünüz?
- Məncə də, yüz faiz qayda pozuntusudu. Hakimlikdən danışanda deyirlər ki, baş məşqçi bəhanə axtarır. Hakim dedi ki, VAR-da baxdıq, top Belajdi Pusinin əlinə dəyib. Bundan başqa da bir neçə epizod oldu. Bir tərəfdən xoşdu ki, "Qarabağ"la oyunlarda belə sərt mübarizələrə imkan verirlər. Amma son dəqiqədə belə qol buraxmaq çətindi. İkinci dövrədə hakim səhvləri bizə çox təsir edib. Bu gün tam başqa olaylar ola bilərdi. Bunu da keçməliyik.

- Sizcə, hakimliyin səviyyəsi budu, yoxsa hansısa komandalara komək edirlər?
- Komandalara işləyirlər sözü ağır olar. Amma görünən odu ki, hakimlər bu il yükü daşıya bilmədilər. Hamıya aid deyil, yaxşı hakimlərimiz də var. Amma nəticəyə təsir edən səhvlər çox oldu. Onlar da inkişaf etməlidi. Eşitdiyimə görə, çempionatda komanda sayının atmamasının səbəblərindən biri də hakimlərin az olmasıdı. Bu mövqedə də iş getməlidi.

- Komandadan neçə nəfər gedəcək?
- Çalışacağıq ki, 4-5 transfer edək. Gedənlərlə bağlı yüz faiz qərar verməmişik. Son oyundan sonra fikirləşəcəm. Bir futbolçu var ki, bu gün yaxşı mənada fikrimi dəyişdi. Məşqçilikdə belə şeylər var.