Türkiyə kubokunu qazanmaqla mövsümü titulla tamamlayan ''Trabzonspor'' yay transfer dönəminə çox sürətli daxil olub.

Ernest Muçini ''Beşiktaş''dan daimi əsasda transfer edən, eləcə də Ruslan Malinovski və gənc istedad Tyerri Karadeniz ilə anlaşan ''bordo-mavililər'' indi də ''Benfika''dan oyunçu almağa hazırlaşırlar. Özü də 10 milyon avroya!

Portuqaliyanın ''Rekord'' nəşrinin yazdığına inansaq, ''Trabzonspor'' Kapo Verde yığmasının üzvü Sidni Kabralın transferi üçün ''Benfika'' ilə ilkin anlaşma əldə edib. 23 yaşlı futbolçu sağ cinah müdafiəçisidi. Niderlandda doğulan və futbola ''Tvente''nin akademiyasında başlayan Kabral peşəkar karyerasının ilk illərini Almaniyanın aşağı liqa klublarında keçirib. Cari mövsümə ''Eştrela''da başlayan Kabral qış transfer dönəmində Joze Mourinyonun istəyi ilə 6 milyon avroya ''Benfika''ya transfer olundu. İstedadlı futbolçu ötən mövsüm 28 rəsmi oyunda iştirak edərək 6 qol, 6 məhsuldar ötürməlik diqqətçəkən performans sərgiləyib.

Maraqlıdı ki, ''Trabzonspor'' bir ay ərzində ikinci dəfə öz transfer rekordunu yeniləyə bilər. Komanda mayın ortalarında Muçini ''Beşiktaş''dan 8,5 milyon avroya alaraq tarixinin ən bahalı transferini reallaşdırdı. Düzdü, bu məbləğ qarşı tərəfə 8 hissəyə bölünərək ödəniləcək.

İndi də ''Trabzonspor'' Kabrala görə 10 milyon avro ödəyərək rekordunu yeniləməyə hazırlaşır. Bu futbolçunun qarşıdakı mundialda sərgiləyəcəyi oyunla dəyərini artıracağı gözlənilir.