Ötən mövsümün ikinci dövrəsində icarə əsasında şərəfini qoruduğu ÇSKA-dan ayrılan və hələ də müqavilə ilə ''Lill''ə məxsus olan Yusuf Yazıcı barədə yeni transfer şaiyəsi yayılıb.

25 yaşlı vingerin PSJ-yə transfer oluna biləcəyi iddia olunur. Fransa mətbuatının yazdığına inansaq, meneceri Yusufun xidmətini PSJ-yə təklif edib. Paris nəhəngində Luiş Kampuşun idman direktoru vəzifəsinə gətirildiyini və Kristof Qaltyenin də baş məşqçi kimi təyinatının bu günlərdə rəsmiləşəcəyini nəzərə alsaq, bu variant kifayət qədər real görünür. Çünki Kampuş Yusufu gözəl tanıyır və onun ''Lill''ə gəlişində böyük rol oynayıb. Eyni zamanda Yazıcı ''Lill''dəki ilk iki mövsümdə Qaltyenin başçılığı altında oynamışdı. Şaiyələrə inansaq, Kampuş ilk növbədə PSJ-yə Renato Sançeşi, ikinci növbədə isə Yusufu gətirməyi planlaşdırır. Xatırladaq ki, 25 yaşlı türkiyəli vinger ÇSKA-da 12 rəsmi oyunda 8 qol, 2 məhsuldar ötürməlik performans sərgiləsə də, Moskva klubu ''Lill''in tələb etdiyi 11 milyon avronu ödəməkdən imtina etmişdi.