"Turan Tovuz"un İdarə Heyətinin sədri Ehtiram Quliyev şəxsi "feysbuk" sosial şəbəkə hesabında etdiyi paylaşımla diqqət çəkib.

"Football-plus.az" xəbər verir ki, həm də "Huner Group"un təsisçisi və direktoru olan funksioner Təbriz təmsilçisi olan "Traktor"un loqosunu paylaşıb.

Azarkeşlər bunu haqlı olaraq "Turan Tovuz" və "Traktor" arasında yoxlama oyununun keçiriləcəyinin anonsu kimi başa düşüb.

Xatırladaq ki, "bozqurd" təlim-məşq toplanışı keçirmək məqsədilə bu gün Türkiyəyə yollanıb. Komanda 19-dək Ankaranın Qızılcahamam bölgəsində, iyulun 24-dən avqustun 6-dək isə Boluda olacaq. Qardaş ölkədəki toplanış çərçivəsində baş tutacaq 4 yoxlama oyunundakı rəqiblər hələ bəlli deyil.

Maraqlıdı ki, başa çatan mövsümdə tarixində ilk dəfə İran çempionu olan "Traktor" da iyulun 8-də təlim-məşq toplanışı keçmək məqsədilə Türkiyəyə yollanacaq. Görünür, komandalar arasında yoxlama matçı məhz Türkiyədə baş tutacaq.

KƏNAN BAHADIR