Bilindiyi kimi, Misli premyer-liqasında 2024/25 mövsümü avqustun 2-də start götürəcək.

1-ci liqa isə sentyabrın 11-dən etibarən yeni mövsümü açıq elan edəcək. Bu üzdən elita təmsilçilərindən fərqli bir qədər rahatdılar. Bəs aşağı dəstədən hansı komandalar təlim-məşq toplanışına başlayıb?

2023/24 mövsümünü uğursuz başa vuraraq aşağı liqaya yuvarlanan “Qəbələ” planlarını açıqlayıb. “Qırmızı-qaralar” məşqlərə iyulun 25-də Qəbələdə başlayacaq. Seleksiya xarakterli hazırlıq prosesi bir həftə davam edəcək. Ardından komanda təlim-məşq toplanışına start verəcək. Qəbələ şəhər stadionunda gerçəkləşəcək hazırlıq prosesində yoxlama oyunlarının keçirilməsi planlaşdırılıb.

Ötən “futbol ili”ndə 2-ci liqanın qalibi olaraq birinci liqaya yüksələn “Bakı Sportinq” isə dünən məşqlərə start verib. İyulun 15-də başlayan hazırlıq prosesi bir həftə davam edəcək. Ardından “ağ-göylər” təlim-məşq toplanışına başlayacaq. Toplanış Buzovna stadionunda reallaşacaq.

Çempionluğa namizədlərdən olmuş “İmişli” iyulun 23-də toplanacaq və öz stadionunda məşq edəcəl. Hələlik başqa planlar bəlli deyil.

Mövsüm ərzində çempion olacağı gözlənilən, ancaq yenidən 1-ci liqada mübarizə aparacaq “Qaradağ Lökbatan” isə iyulun 22-də məşqlərə start verəcək. Avqustun 10-da toplanışın növbəti mərhələsi başlayacaq. Bu müddətdə 5 yoxlam oyunu nəzərdə tutulub. İyulun 28-də MOİK, avqustun 9-da “Difai Ağsu”, avqustun 16-da “Bakı Sportinq” ilə oyunların olacağı dəqiqdi.

“Zaqatala” iyulun 25-də seleksiya xarakterli hazırlıq prosesinə başlayacaq. Komanda təlim-məşq toplanışına avqustun 1-dən etibarən start verəcək.
MOİK növbəti mövsüm üçün hazırlığa erkən başlayıb. Belə ki, “hərbçilər” iyulun 10-da Sumqayıtda bir araya gəlib. Dünən isə Bakı Su İdman Sarayında qum üzərində məşqlər başlayıb. Burdakı məşqlər 23-nə qədər olacq. 1-ci liqaya yenicə yüksələn və yeni baş məşqçi Elhad Nəziri ilə yola davam edən “Cəbrayıl” da iyulun 15-də təlim-məşq toplanışına start verib.
“Karvan” hazırlığa ən tez başlayan komandadı. Yevlax təmsilçisi iyulun 8-də yığışıb. Bu gün ilk yoxlama oyununun keçirilməsi planlaşdırılır. Niyyəti çempionluq olan bölgə təmsilçisinin daha 4 yoxlama oyunu keçirmək fikri var.

Mingəçevirdə isə havalar həddindən artıq isti olduğundan, eyniadlı komanda toplanışa başlamayıb. Həmçinin “nur şəhəri”nin təmsilçisi idarə heyətinin büdcə ilə bağlı iclasını gözləyir. Böyük ehtimalla planlar 10-15 günə bəlli olacaq.
“Difai Ağsu” isə hazırlıq planları barədə bizə heç bir məlumat vermədi. Klub rəsmilərindən məlumat almaq istəsək də, cavabında hələ bir müddət də dincələcəklərini dedilər.

RÖYANƏ OĞUZ