2025-ci ilin dekabrında adı çəkilən idmançı yarışdankənar yoxlama çərçivəsində test nümunəsi verməkdən boyun qaçırıb. Sonrakı araşdırma zamanı 26 yaşlı tennisçi gec saatlarında evinin qapısını döyən, özünü təqdim etməyən dopinq müfəttişinin təklfindən boyun qaçırmasını təhlükəsizliyinə görə qorxması, stress və psixi durumunun yerində olmaması ilə izah edib. Ancaq Marketanın həmin münaqişə zamanı yaşananları sosial şəbəkədə yaymasını əsas gətirən agentlik bu dəlilləri əsaslı saymayıb.
Müstəqil tribunalın qərarı ilə Vondrouşova 2030-cu il iyunun 21-nə qədər diskvalifikasiya olunub. O, ITF, WTA, ATP və milli assosiasiyaların bayrağı altında keçirilən rəsmi yarışlarda iştirak edə bilməz.
Marketa sərt şəkildə cəzalanmasına sosial şəbəkə hesabında belə reaksiya verib:
“Heç vaxt dopinq qəbul etməmişəm. Heç vaxt dopinq-testim müsbət nəticə verməyib. Karyeram boyunca saysız-hesabsız yoxlamadan keçmişəm, korta həmişə təmiz vicdanla çıxmışam. Həyatımı dəyişən həmin qalmaqaldan cəmi üç gün sonra məni yenidən yoxladılar. Nəticə mənfi oldu. Bütün əvvəlki dopinq-testlərdə olduğu kimi”.
Xatırladaq ki, Vondrouşova 2023-cü ildə “Uimbldon”un qalibi, 2019-cu ildə isə “Rolan Qarros”un finalçısı olub. O, WTA turnirlərində üç titul qazanıb.
