Bu il 20 yaşadək futbolçular arasında keçiriləcək dünya çempionatınən yeni təşkilatçısı müəyyənləşib. Turnirə Argentina evsahibliyi edəcək.

"Football-plus.az" xəbər verir ki, məlumatı FİFA-nın saytı yayıb. Xatırladaq ki, mundialın əvvəlki təşkilatçısı İndoneziya idi. Lakin FİFA Asiya ölkəsinin Bali adasının qubernatoru Vayan Kosterin İsrail yığmasını turnirdə iştirak etməməyə çağıran açıqlamaları ilə bağlı qalmaqaldan sonra İndoneziyanı turnirə evsahibliyi etmək hüququndan məhrum etmişdi. Ali futbol qurumu ölkədə israilli futbolçuların gəlişi ehtimalı ilə bağlı etiraz aksiyalarının başlamasını da nəzərə almışdı.

FİFA baş verənlərdən sonra Argentinanın turnirin təşkilatçısı olacağını bəyan edib. Argentina millisi ev sahibi kimi İndoneziya yığmasını əvəz edəcək.

Qeyd edək ki, U-20 dünya çempionatı 20 may - 11 iyun aralığında keçiriləcək.