FİFA 2025-ci ildə Klublararası Dünya Çempionatının (KDÇ) oyunlarının keçiriləcəyi məkanların siyahısını açıqlayıb. Turnirin həyəcanı ev sahibi olacaq ABŞ-nin 12 stadionunda yaşanacaq.

Ali futbol qurumunun saytının yaydığı xəbərə görə, ilk dəfə 32 komandanın iştirak edəcəyi turnirin finalı Nyu Cersi ştatının İst Ruterford şəhərindəki “MetLife” stadionunda olacaq. Şarlott, Sinsinnati, Los Anceles, Mayami, Neşvill, Orlando (iki stadion), Filadelfiya, Sietl, Vaşinqton və Atlanta da KDÇ-nin oyunlarına evsahibliyi edəcək.

Yeri gəlmişkən, FİFA gələn il 15 iyun – 13 iyul aralığında təşkil ediləcək KDÇ-yə görə 3-cü “transfer pəncərəsi”nin açılmasına qərar verib. Yeni “transfer pəncərəsi” iyunun 1-dən 10-na qədər ola bilər. Bu, mundialdan əvvəl klubların yeni transferlər etməsinə və ya turnirin sonuna qədər müqaviləsi qüvvədən düşəcək oyunçuları ilə yenidən anlaşmasına şərait yaratmaq üçün zəruri sayılıb.

FİFA-nın saytının məlumatında yeni “transfer pəncərəsi”nin nəhəng turnirdə iştirak edəcək klublar üçün nəzərdə tutulduğu qeyd olunub. Amma bundan digər klublar da yararlana bilər. Bunun üçün həmin klubların mənsub olduğu milli futbol federasiyalarının 3-cü “transfer pəncərəsi”ni qəbul etməsi şərtdi.