39 yaşında klubunu dəyişdi
Məşhur futbolçu Halkın yeni klubu məlum olub. “Atletiko Mineyro”dan ayrılan 39 yaşlı braziliyalı hücumçu bundan sonra da A seriyasında top qovacaq.
O, “Fluminense” ilə anlaşıb. Təcrübəli futbolçu ilə imzalanan müqavilənin müddəti 2027-ci ilin sonuna qədər nəzərdə tutulub. O, yeni komandasına azad agent kimi qoşulub. Braziliya klubunun rəsmi məlumatında Halkun zəngin karyerası xüsusi vurğulanıb:
“Braziliyanın həqiqətən seçilən futbolçularından biri ilə 31 dekabr 2027-ci il tarixinə qədər razılaşdırılan müqavilə imzaladıq. Halk çıxış etdiyi bütün klublarda çempionluqlar qazanıb”.
Hücumçu mayın 1-də “Atletiko Mineyro” ilə müqaviləyə qarşılıqlı razılıq əsasında xitam verib. Halk 2021-ci ildən çıxış etdiyi bu komanda ilə Braziliya çempionu olub, həmçinin dörd dəfə Minas Jerays ştat çempionatının qalibi adını qazanıb. “Atletiko Mineyro”da keçirdiyi 309 oyunda 140 qol vurub. Braziliya yığmasının sabiq üzvü cari mövsümdə meydana çıxdığı 22 oyunda 5 qol vurub və 3 məhsuldar ötürmə verib.
Təcrübəli futbolçu karyerası ərzində “Vitoriya”, “Kavasaki Fronteyl”, “Konsadele Sapporo”, “Tokio Verdi”, “Portu”, “Zenit” və “Şanxay Port”da da çıxış edib. İri cüssəli hücumçunun milli komandada 2009-21-ci illərdə 49 oyuna 11 qol vurduğunu da xatırladaq.
Digər xəbərlər
