La Liqanın “Barselona” ilə vacib oyunu ərəfəsində “Real”da ab-hava əməlli-başlı korlanıb. Komandanın iki oyunçusu arasında dava-dalaş düşüb.
“Marca” qəzetinin yaydığı xəbərə görə, Valdebebasdakı bazada keçirilən məşq zamanı yarımmüdafiəçilər Orelyen Çuameni ilə Federiko Valverde arasında ciddi mübahisə yaranıb.

Oyun epizodlarından birində kobud hərəkətə görə qarşılıqlı söz atışmasına başlayan futbolçular əsəblərini cilovlaya bilməyiblər. Az qala əlbəyaxa olan Orelyen ilə Federikonu oyundaşları sakitləşdirməyə çalışıblar. Amma səbəbkarlar məşqdən sonra paltardəyişmə otağında münasibətlərini yüksək tonda davam etdiriblər. Nəticədə Çuameni Valverdeyə ciddi xəsarət yetirib. Federiko təcili xəstəxanaya çatdırılıb. İlkin xəbərlərdə rəhbərliyin cümə axşamı bu hadisə ilə bağlı təcili iclas keçirdiyi də bildirilir.

Qeyd edək ki, bu, son günlər “Real”da baş verən ikinci belə insidentdi. Yerli mənbələr bir neçə gün əvvəl müdafiəçilər Antonio Rüdigerlə Alvaro Karreras arasında da ciddi mübahisə yaşandığını xəbər vermişdi.