Artıq yeni mövsümə hazırlıq prosesinə başlayan “Real”ın baş məşqçisi Karlo Ançelottinin dediyinə görə, yeni transferlər gözləməyə dəyməz: “Çuameni və Rüdigerin gəlişi ilə komandanın səviyyəsi artacaq. Antonio müxtəlif mövqelərdə oynamağa qadir əla mərkəz müdafiəçisidi. Orelyen də yarımmüdafiənin müxtəlif mövqelərində oynaya bilər. Gənc olsa da, artıq Fransa yığmasında oynayır. Komandada rəqabət uğurun açarıdı. Əlbəttə, bu oyunçuların uyğunlaşmasına müəyyən vaxt gedəcək, ancaq proses sürətli getməlidi, çünki ikisi də yaxşı futbolçudu. Onu deyə bilərəm ki, artıq yeni transfer olmayacaq. Bizdə belə də hər şey qaydasındadı”.
Ançelottini məmnun edən məqamlardan biri də Eden Azarın toplanışdakı idman formasıdı. Belçikalı xavbek düşərgəyə ideal formada dönüb, bəlkə də “Çelsi”dən Madridə köçəndən bəri belə vəziyyətdə olmayıb. Ançelotti Azarın məşqlərdəki canfəşanlığından da razıdı. Eden Vinisiusla Rodriqonun indiki məqamda italiyalı mütəxəssisin gözündə üstün olduqlarını anlayır, ancaq ona da əmindi ki, start heyətində yer almaq mümkünsüz deyil. Azarın ötən mövsüm La Liqada keçirdiyi 18 oyunda bir məhsuldar ötürmə ilə yadda qaldığını da xatırladaq.
“Real” veteran forvardı Kərim Benzemaya dincəlmək üçün əlavə bir neçə gün də ayırıb. Komandanın iyunda keçirilən beynəlxalq oyunlarda iştirak edən bütün futbolçuları, o sıradan Luka Modriç, debütantlar Antonio Rüdiger və Orelyen Çuameni də toplanışa qatılıb. 34 yaşlı Benzema yay tətilini iyulun 19-na qədər uzatmaqla bağlı xüsusi icazə alıb, ardından Los-Ancelesdə komanda yoldaşlarına qoşulacaq. Məzuniyyətdən hamıdan gec çıxacaq fransalının növbəti mövsüm “Real”ın əsas kapitanı olacağını da xatırladaq.