“Bavariya” üçün son illərdə ölkə kubokundakı macəralar uğurlu alınmırdı. Zarafat deyil, turnirin 20 qat qalibi 2020-dən bəri heç finala da yüksələ bilmirdi. Bu, XXI əsrdə “rekordmayster”in kubokda finala həsrət qaldığı ən böyük dönəm idi.

Bu uğursuz seriyaya son qoymaq üçün Münhen nəhəngi Leverkuzenə səfər etmişdi. Martın ortalarında bu komandaların bundesliqa çərçivəsində “BayArena”da keçirilən oyunu qalmaqallı hakimliklə əlamətdar olmuş, 1:1-lik bərabərliklə yekunlaşmışdı. Amma bu dəfə Vensan Kompaninin “qol maşını” “Bayer-04”ə yerini göstərdi.

Ən güclü heyətlə meydana çıxan Almaniya futbolunun flaqmanı gözləniləndən də asan qələbə qazandı. Hesabı hissənin ortalarında, təbii ki, Keyn açdı. İngiltərəli qoleador o qədər məhsuldar mövsüm keçirir ki, artıq onun bir oyunda meydanı qolsuz tərk etməsi təəccüblü görünür. Ardıcıl 6-cı rəsmi oyunda fərqlənən ünlü forvard bu mövsüm “Bavariya”nın heyətində 45-ci oyunda 53-cü qolunu vurdu!

Yeri gəlmişkən, Keyn bu mövsüm kubokda 7-ci qolunu vurdu. XXI əsrdə bu turnirdə bir mövsümə yalnız Tomas Müller (2013/14, 8) daha çox qol vurub. Meydan sahiblərinin matçboyu “çərçivə”yə yeganə zərbəsi 52-ci dəqiqəyə təsadüf etdi və Noyer komandasını xilas etdi. Onun həmkarı Flekken isə matçı 9 seyvlə tamamladı. Ancaq bu performans yetərli olmadı. Yekun nəticəni son anlarda Qoretskanın ötürməsindən sonra Dias müəyyənləşdirdi. Yan xətt hakimi əvvəlcə bayrağı qaldırsa da, VAR-ın müdaxiləsindən sonra qol qeydə alındı.

Beləliklə, bundesliqada artıq çempionluğu rəsmiləşdirən və kubokda adını finala yazdıran “Bavariya” Avropada trebl şansını davam etdirən yeganə klubdu.

Maraqlıdı ki, münhenlilərin qadınlardan ibarət komandasının da trebl şansı davam edir. “Bavariya” bir mövsümdə həm kişi, həm də qadın futbolunda trebl edən ilk komanda kimi futbol tarixinə düşə bilər!
yarımfinal

Bayer-04 – Bavariya 0:2
Keyn, 22. Dias, 90+3.
Bayer-04: Flekken, Vaskes (Poku, 39), Kuansa, Andrix (Tillman, 84), Tapsoba, Qrimaldo, Palasios, A.Qarsiya, Maza, Tella (Kalbret, 77), Şik.
Bavariya: Noyer, Stanişiç, Upamekano, Ta, Laymer (Devis, 74), Kimmix, Pavloviç (Qoretska, 74), Olise, Musiala (Kim Min Ce, 84), Dias, Keyn.
Ştutqart – Frayburq 2:1, əlavə vaxtda
Undav, 70. Tomaş, 119 – Eggeştayn, 28.