Qışdan sonra uğurlu nəticələrlə yadda qalan “Araz Saatlı” dağılmaq təhlükəsi ilə üz-üzədi. Bu barədə klub rəsmi sosial şəbəkə hesabında paylaşım edib, kart hesabını göstərməklə yardıma ehtiyacı olduğunu bildirib: “Hörmətli Saatlı sakinləri, dəyərli iş adamları, sahibkarlar və doğma rayonumuzun idmansevər ictimaiyyəti! Bildiyiniz kimi, Saatlı rayonunu futbol üzrə Azərbaycan 2-ci liqasında təmsil edən “Araz Saatlı” hazırda çətin bir sınaq qarşısındadı. Rayonumuzun idman şərəfini qoruyan komandamızın mövsümü uğurla başa vurması və gələcəyini qoruması üçün bu an sizin dəstəyinizə və həmrəyliyinizə ehtiyac var. Təəssüf ki, cari maliyyə çətinlikləri səbəbindən komandamızın qarşıdan gələn son 4 oyunda iştirakı təhlükə altına düşmüşdür. Biz komandamızın meydanı tərk etməsini deyil, sonadək mübarizə aparmasını və rayonumuzun adını layiqincə təmsil etməsini istəyirik. Maraqlıdı, nəticələr yaxşıdı, hər şey qaydasında görünür, bəs niyə belə problem yaranıb? Klubun prezidenti Ədalət Abdullayev “Football-plus.az”ın sualını cavabladı: “Üç ildi komandaya rəhbərlik edirəm, bizdə sponsor olmayıb. İş adamları kömək edib, sağ olsun. Maddi yardım sponsorluq anlamına gəlmir. Komanda çətinliklə ayaqda qalmağa çalışır. Dekabrdan etibarən AFFA-dan gələn yardımlar dayanıb. Ciddi çətinliklərimiz var. Növbəti oyuna çıxmaq ümidi ilə yaşayırıq. Lisenziyanın tələbini yerinə yetirmişik, qalır idman nəticələri. Saatlı sakinlərinə, iş adamlarına səslənirəm, doğma rayonlarının komandasına yardım etsinlər”.

Xatırladaq ki, “Araz Saatlı” hazırda 14 xalla sonuncu - 12-ci pillədə qərarlaşıb.

MÜZƏFFƏR QULUZADƏ