“Neftçi”nin futbolçusu Vensan Abubakarın “Portu”nun stadionu “Estadio do Draqao”da klubun prezidenti Andre Villas-Boasla görüşdüyünü xəbər vermişdik. Daha doğrusu, bu barədə Portuqaliya klubunun rəsmi saytı məlumat yaymışdı.

Həmin paylaşım kamerunlu forvardın yenidən sabiq klubunda forma geyəcəyi yönündə iddiaların ortaya çıxmasıyla nəticələnmişdi. Səfərlə bağlı açıqlama verən Abubakar yaxın zamanda müəyyən yeniliklərin baş verə biləcəyini demişdi.

Bilindiyi kimi, “Portu” ilə adı çəkilən futbolçu arasında bağlılıq var. O, müxtəlif illərdə bu kollektivin şərəfini qoruyub. Üstəlik oyunçunun klub rəhbərliyi ilə yaxın münasibətlərə malikdi.

Bəs, səfərin məqsədi nə idi? Adi bir ziyarət? Yoxsa həm ziyarət, həm də ticarət?

Düzdü, bu məsələnin Abubakarın futbol akademiyası açmaq niyyəti ilə bağlı olduğunu deyənlər var.

Bəs, “Neftçi” ulduzunun səfərindən xəbərdar idimi? Bu sualı “ağ-qaralar”ın mətbuat xidmətinin rəhbəri Asəf Zeynallıya ünvanladıq. Klub rəsmisi “Football-plus.az”a açıqlamasında səfərin futbolçulara istirahət verildiyi günlərdən birində həyata keçirildiyini, klubun mövzu ilə bağlı hansısa məlumatının olmadığını bildirdi.

Xatırladaq ki, paytaxt təmsilçisi ötən ilin oktyabrında transfer etdiyi Abubakarla “1+1” illik müqavilə imzalayıb.

KƏNAN BAHADIR