Hazırda ölkə futbolunun gündəm mövzularının başında “Neftçi”nin yeni transferi dayanır. Bəli, “ağ-qaralar”ın çoxdan yolunu gözlədiyi kamerunlu hücumçu Vensan Abubakar şənbədən bazara keçən gecə Bakıya təşrif buyurdu.

Mübaliğəsiz Azərbaycan futbol tarixində ən səs-küy yaradan transferlərdən biridi. İndiyə qədər heç bir legioner futbolçunun ölkəyə qədəm qoymasını azarkeşlər belə coşqu ilə qarşılamamışdı. Burda əsas rolu elə klub oynadı. Şənbə günü günorta saatlarında bununla bağlı elan verdilər, hava limanında anşlaq, ajiotaj yaranmasına səbəbkar oldular.

Bəs Portuqaliyada “Portu”nun, Türkiyədə “Beşiktaş”ın heyətində titullar qazanan futbolçu “Neftçi”yə nə dərəcədə fayda verə bilər?

Faydası yüz faiz dəyəcək. Ən azı piar baxımından. Həm özünə, həm də rəqiblərə. Abubakara görə stadiona gələn azarkeşlərin sayı ən azı iki dəfə artacaq. Buna heç bir şübhə yoxdu. Ölkədə forma satışı mədəniyyətini ən yaxşı şəkildə həyat keçirən klubun “Neftçi” olduğunu nəzərə alsaq, şəhərdə bundan sonra Abubakarın 45 nömrəli forması ilə daha çox azarkeş görə bilərik. Düzdü, Abubakar Azərbaycana gələn birinci ulduz futbolçu deyil.

Bu günə qədər “Neftçi” özü, Emil Mpenza, Keysuke Honda, “Qarabağ” Asmir Beqoviç, “Səbail” Mayk Essyen, “Xəzər Lənkəran” Oqtay Dərəlioğlu transferi ilə yadda qalıb. Bunlar arasında ən çox fayda verən Honda olub. Samir Abasov dönəmində yaponiyalı ulduz 7-8 oyunluq, mövsümün sonu üçün gətirilmişdi. O mövsümün finalında da “Neftçi” yeddi ildən sonra çempion oldu. İndi isə Abubakar var. Piar xeyri verəcək, bəs oyun, nəticə?

Vensan iki mövsüm əvvəl Konfrans Liqasının təsnifat mərhələsində “Beşiktaş”ın heyətində “Neftçi”yə iki qol vurmuşdu. Hər iki qolu da keyfiyyəti hesabına. 33 yaşı var. Yaşının saxtalaşdırılması ilə bağlı xəbərlər şayiədən başqa bir şey deyil. Dünya dempionatında iki dəfə oynamış, üçüncüyə hazırlaşan biri, mərkəz hücumçusu, qol duyumu çox yüksək dərəcədə olan futbolçu “Neftçi” üçün vacib idi. Amma komandaya uyğunlaşması nə qədər vaxt alacaq, bu da ayrı sualdı.

Fiziki formasını bərpa etməsi, yəqin ki, çox çəkməz. Beş aya yaxındı futbol oynamasa da, fərdi qaydada məşq edib. Bu səviyyəli futbolçular heç vaxt “futbolun başını buraxmır”. Ən azı fərdi məşq etməsəydi, heç milliyə də çağrılmazdı. Belə taran tipli forvard çoxdan “Neftçi”də olmayıb. Son nümunə kimi Baqali Dabonu göstərə bilərik. Saldanya da var idi, amma bu tip hücumçu deyildi.

Abubakar elə futbolçudu ki, hər epizoddan qol çıxara bilər. Çətini, yəqin ki, çempionata uyğunlaşmaq olacaq. Çempionatı ciddiyə alsa, rəqiblərə xəfif yanaşmasa, hər şeyin öhdəsindən gələr. Afrikalı futbolçudu. İntizam problemi var. Türkiyədə də intizamla bağlı yaşadığı problemlər qulağımıza gəlib çatırdı. Abubakarı psixoloji cəhətdən hazırlamalı olan bir nəfər var – Samir Abasov. Son mətbuat konfransında “Abubakarı görüb rəqib müdafiəçilər daha yaxşı oynayacaq, bu bizə çətin olacaq” deməklə ümid edək ki, gələcək üçün özünə “ayaq yeri qoymadı”. Heç vaxt ağlıma gəlməzdi ki, Abubakarın gəlişini də pis tərəfə yozmaq mümkün ola...

Abubakar komandada aşkar fərq yarada bilməsə, bu da ciddi problem yaradacaq. Mövsümün əvvəlində klubun idman direktoru Cenk Sümerin “əsas məqsədimiz maliyyə balansını düzəltməkdi” deməsi ilə 500 min avroluq maaşla futbolçu gətirmək tərs-mütənasibdi. Lakin Abubakar həqiqətən də Abubakar olduğunu göstərsə, can da qurban verilər.

Təki xeyirli olsun. Ümid edək ki, məhz Abubakar “ağ-qaralar”ı ağ günə çıxaracaq.

MÜZƏFFƏR QULUZADƏ