Kamerunlu ulduz Vensan Abubakar ötən bazar Misli premyer-liqasında debüt etdi. Lakin gözlənilən – dolu tribunalar görünmədi. Bu isə düşündürücü məqamdı.

Düzdü, bu mövsüm Qəbələdə cəmi bir oyunda bundan çox azarkeş olmuşdu. Belə ki, “Qəbələ”nin ilk oyununu 1000 tamaşaçısı canlı izləmişdi. “Neftçi” ilə oyunda isə stadionda vur-tut 600 nəfər var idi. Bunların da üçdəbiri “Neftçi” azarkeşləri idi.

Abubakarın debüt ehtimalının real olduğunu nəzərə alsaq, Qəbələyə Bakıdan cəmi 200 azarkeşin getməsi ilə öyünməyə dəyməz. Lakin “Forza Neftçi”nin rəhbəri Səccad Abbasov heç bir Qəbələ səfərində bu qədər olmadıqlarını bildirmişdi. Yəqin ki, burda da əsas rolu Abubakarın varlığı oynayıb.

Hər halda, 200 azarkeşlə öyünmək üçün əsas yoxdu. Paytaxt klubu Abubakara lap milyonlar versə də, “Portu”, “Beşiktaş” azarkeşini görən futbolçu boş tribunalar önündə oynamaq üçün motivasiya tapa bilməz.

Odu ki, “Neftçi” azarkeşi nəticə istəyirsə, tribunada da olmalıdı.

MÜZƏFFƏR QULUZADƏ