Finalissima sual altındadı - İran dünya çempionatında olmayacaq?
Yaxın Şərqdə vəziyyətin yenidən pisləşməsi idmana və bu sahənin ən populyar növü sayılan futbola da mənfi təsir edə bilər.
"Football-plus.az" xəbər verir ki, fevralın 28-də Amerika Birləşmiş Ştatları (ABŞ) və İsrail İran əleyhinə birgə hərbi əməliyyata başlayıb. İran isə buna cavab olaraq ABŞ-nin hərbi bazalarına və İsrail, Qətər, Küveyt, BƏƏ, Səudiyyə Ərəbistanı və Bəhreyndəki obyektlərinə zərbələr endirib. Belə vəziyyətdə cənub qonşumuzun üç aydan sonra start götürəcək dünya çempionatında iştirakının mümkün ola bilməyəcəyi ehtimalı yaranıb.
Hər halda İran Futbol Federasiyasının prezidenti Mehdi Tac ölkəsinin nəhəng turnirdə iştirakının sual altında olduğunu açıqlayıb.
İran dövlət televiziyasına açıqlama verən federasiyanın rəhbəri İsrail və ABŞ ilə davam edən hərbi qarşıdurma fonunda mundiala qatılmağın real görünmədiyini bildirib:
“Bu gün başverənlər və ABŞ-nİn hücumu fonunda Dünya çempionatına ümidlə baxmağımız çətin görünür. Lakin bu məsələdə qərarı verənlər idman rəhbərləridi”.
Tac həmçinin İranda futbol liqalarında mübarizənin növbəti məlumata qədər dayandırıldığını da qeyd edib. Xatırladaq ki, İran yığması DÇ-2026-nın G qrupunda yarışacaq, bu qrupun oyunları ABŞ-də keçirməlidi. Cənub qonşularımız iyunun 15-də Yeni Zelandiya, 21-da Belçika ilə Los Ancelesdə, 26-da isə Sietldə Misirlə qarşılaşacaq. O da maraqlıdı ki, İran və ABŞ komandaları yarışdıqları qruplardan çıxacaqları halda 1/16 finalda bir-birinə rəqib olmaq ehtimalı da var.
DÇ-2026 11 iyun - 19 iyul aralığında ABŞ, Meksika və Kanadanın şərikli evsahibliyi ilə keçiriləcək. Turnir ilk dəfə 48 komandanın iştirakı ilə təşkil olunacaq və 39 gün davam edəcək.
Yaxın Şərqdəki münaqişə səbəbindən Argentina və İspaniya yığmaları arasındakı Finalissima oyunu da baş tutmaya bilər. Amerika Kuboku-2024 və AÇ-2024- ün qalibləri arasındakı matç martın 27-də Qətərdə keçirilməlidi. Fars körfəzi ölkələrindən biri olan bu dövlət hazırda ABŞ və İsrailin hücumlarına cavab olaraq İran tərəfindən hədəfə alınıb. FİFA Qətərin müvafiq orqanlarının bütün idman tədbirlərini müvəqqəti olaraq dayandırmaq haqda açıqlamasından başqa hələlik heç bir qərar verilmədiyini bildirib.
Ali futbol təşkilatının məlumatına görə, Finalissimanın keçirilib-keçirilməməsi ilə bağlı qərar yaxın günlərdə veriləcək. FİFA məlum səbəbdən ABŞ və İsrail komandalarına sanksiya tətbiqinin mümkün olub-olmaması ilə bağlı sorğuya isə cavab verməyib.
Digər xəbərlər
