Küveyt kubokunun bir neçə oyununu idarə etmək üçün Azərbaycanı tərk edən ədalət təmsilçiləri Yaxın Şərqdə yaranmış hərbi gərginlik səbəbindən ölkəyə qayıda bilmir. Çünki ABŞ, İsrail və İran arasında yaşanan qarşıdurma bölgədə hava məkanının bağlanmasına səbəb olub. Onlar hazırda Küveytdədi.
Bəs, AFFA bu məsələ ilə bağlı hansısa addım atıbmı? Ədalət təmsilçislərinin ölkəyə gətirilməsi üçün hansı işlər görülür?
Bu suallarla AFFA-nın Mətbuat və İctimaiyyətlə Əlaqələr departamentinin rəhbəri Murad Axundova müraciət etdik. Onun “Football-plus.az”a cavabı:
“Əliyar Ağayev baş hakim, Nicat İsmayıllı isə VAR hakimi kimi Küveyt kubokunun oyunlarına təyinat almışdı. Təəssüf ki, hazırda ölkəyə qayıda bilmirlər. AFFA Hakimlər Komitəsi həm Əliyar, həm də Nicat bəylə əlaqədədi. Hakimlər də öz növbəsində ölkəmizin Küveytdəki səfirliyiylə danışır. Bu barədə Xarici İşlər Nazirliyinə də məlumat verilib. Çalışırıq ki, hakimlər sağ-salamat Azərbaycana qayıda bilsinlər”.
KƏNAN BAHADIR
