Karyerasını Türkiyənin 1-ci liqa təmsilçisi ''İğdır''da davam etdirən Fode Koyta maraqlı bir xəbərlə gündəmə gəlib.

"Football-plus.az" xəbər verir ki, Fransızəsilli qvineyalı forvard ''Show TV''də yayınlanan ''Ramazan Gecələri'' verilişinin canlı yayınının qonağı olub. O, Ramazan ayının gəlməsi ilə Türkiyədə yenidən trendə çevrilən və sosial şəbəkələrdə tez-tez rastlanan ''Kəbədə hacılar hu deyir Allah'' ilahisi səsləndirib.

33 yaşlı futbolçu bu dəfə yaşıl meydanda yox, efirdəki performansı ilə böyük alqış qazanıb. Sosial şəbəkələrdə onun bu hərəkəti təriflərə və xoş sözlərə layiq görülüb.

Qeyd edək ki, Fode Koyta artıq 10 ilə yaxındı, karyerasını Türkiyədə davam etdirir. O, 2016-21-ci illərdə və 2022/23-də ''Kasımpaşa''nın, 2021/22-də ''Trabzonspor''un, 2023-25-də ''Sivasspor''un şərəfini qoruyub. ''İğdır''da isə ilk mövsümünü keçirir. Bu mövsüm 1-ci liqada 18 qarşılaşmada forma geyərək 5 qol vurub. ''Monpelye''nin yetirməsi olan təcrübəli futbolçu Türkiyəyə gələnə qədər isə ''Lans'', ''Havr'', ''Kan'' və ''Blekbern''də top qovub.