Çempionlar Liqasında pley-offa qədər irəliləyən “Qarabağ”ın missiyası başa çatdı. İki oyuna görə “Nyukasl”a 3:9 uduzan ağdamlılar 1/8 finaldan kənarda qaldı. 

“Qarabağ” cavab oyununda yaxşı oynadı, Bakıdakı kimi biabırçı hesabla uduzmadı. Bəs 6 gün ərzində nə baş verdi? 

Nə qədər absurd səslənsə də, bəlkə də Bəhlul Mustafazədənin ilk oyunun əvvəlində zədələnməsi bizi rüsvayçılıqdan qurtardı. Yox-yox, Bəhlul əla müdafiəçidi, ən güclü yerli futbolçulardan biridi. Amma məhz 28 yaşlı futbolçu sıradan çıxandan sonra Qurban Qurbanov düşündü ki, “beşli” müdafiə ilə də oynamaq olar. 

Maraqlıdı ki, “Qarabağ” iki oyunun nəticəsinə görə 6 top fərqi ilə məğlub olsa da, heç bir oyunun 2-ci hissəsində uduzmadı - Bakıda 1:1, Nyukaslda 2:1. 
Əslində belə komandaya qarşı ən ideal seçim 5 müdafiəçi ilə oynamaq idi. Müasir futbolda bu taktiki sxem müdafiə futbolu demək deyil. “Qarabağ” da bunu göstərdi. Dani Bolt işinin öhdəsindən gəlməyi bacardı. Çoxlarının karyerasını bitirməyi məsləhət gördüyü 34 yaşlı Bədavi Hüseynov isə yaxşı oyun göstərdi. Həqiqətən əzmkarcasına mübarizə apardı, Bəhlulun da yerini doldurdu. Komanda müdafiə olunanda 5 müdafiəçi, 2 yarımmüdafiəçi ilə qapanırdı. Hücuma çıxanda isə Bolt vinger, Xoni Montiel 10 nömrə kimi oynayırdı. Boltu da Mateus Silva “sığortalayırdı”. 

Hər iki oyunun ilk yarısı “Qarabağ” üçün “soyuq duş” oldu - erkən qollar buraxıldı. Amma Nyukaslda komanda daha tez toparlandı. Söhbət təkcə taktiki sxemdən getmir. Futbolçular səfərdə daha döyüşkən, aqressiv, inadkar göründülər. Növbəti mərhələ şansımız sıfra bərabər olsa da, futbolçular minimum heç-heçə üçün vuruşdular. Çünki çempion oyundan bərabərliklə ayrılsaydı, 700 min, qələbə qazansaydı, 2,1 milyon avro qazanacaqdı. Futbolçular hər şey bir kənara, pul üçün də əzmkarlıq çarpışdılar, əcəb etdilər, haqlarıdı. 

Bir sözlə, “Qarabağ” səfərdə göstərdiyi oyunla Bakıdakı rüsvayçı məğlubiyyəti müəyyən mənada unutdurdu ki, bunu da kiçik sevindirici məqam saya bilərik.

MÜZƏFFƏR QULUZADƏ