“Oyundan əvvəl də “Nyukasl”ın qələbə qazanacağı gözlənilirdi. Amma böyükhesablı məğlubiyyət... Bu, “Qarabağ”ın qarşılaşdığı ilk İngiltərə komandası deyildi. Elə bu mövsüm evdə “Çelsi” ilə heç-heçə etmişdi. Amma “Nyukasl”ın ilk dəqiqələrdən etdiyi təzyiq, sürət, oynadığı oyun göstərdi ki, bu komanda Bakıya yanlız qələbə üçün gəlib. Heç-heçə də yox, qələbə üçün. Rəqibin təzyiqi “Qarabağ” müdafiəçilərinin səhvinə gətirib çıxarırdı və bu da qollarla nəticələnirdi. İlk hissədə Mateuş Koxalski bir neçə kritik seyv edərək fərqin daha acınacaqlı olmasına imkan vermədi. “Nyukasl” oyuna çox ciddi yanaşmışdı. “Qarabağ” ilk yarıda heç cür öz oyununu göstərə bilmədi. İngiltərə çempionatında oynayan futbolçularla “Qarabağ”da oynayanları müqayisə etmək də düzgün deyil. Səviyyə, sürət fərqi var. Müqayisə etməyə dəyməz. “Nyukasl” ulduzları olmayan komandadı, kollektiv şəkildə oynayırlar. Dünən də bunun şahidi olduq. İlk hissədə “Qarabağ”ın heç bir şansı olmadı. Hesab elə bu yarıdaca böyük hesabla bitdi. Standart vəziyyətlərdə çox təhlükəliydilər. Təkcə cinahlardan yox, mərkəzdən də “Qarabağ”ın müdafiəsini yarmağı bacardılar. Çox ağıllı oynadılar. Yaxşı təhlil etmişdilər. İkinci hissədə artıq qələbəni təmin etmişdilər, top saxlamağa çalışdılar. Baş məşqçi futbolçularını çox yormamağa çalışdı. Həftəsonu çempionatda “Siti” ilə çətin oyunları var. “Qarabağ”da sağ cinahın zəif olmasının səbəbi rəqibin sol cinahının daha fəal olması idi. Həm müdafiədə, həm də hücumda diqqətliydilər. Leandro Andradenin oyunu heç görünmədi. Təkcə Andrade yox, Abdulla Zubir də, Marko Yankoviç də, Kamilo Duran da özünü göstərə bilmədi. Heç cür oyunları alınmadı. Elvin Cəfərquliyev ikinci hissədə qol vurdu. Bu sevindirici haldı. Səfərdə də oyun var. Bu oyunda, yəqin ki, “Qarabağ” nəsə etməyə çalışacaq. Bəli, ikinci hissədə beş müdafiəçi ilə oynadıq. Çoxdan “Qarabağ”ı belə sxemdə oynayan görmürdüm. Dəyişdilər, qol da vurdular. Çalışdılar ki, nəsə etsinlər, amma “Nyukasl” da gücünü qorudu. “Qarabağ” həmişə öz oyununa sadiq qalıb. Bəli, “Benfika” ilə oyunda 2 top geridə olsalar da, qələbə qazandılar. Amma onda da 4 müdafiəçi ilə buna nail olmuşdular. “Qarabağ” həmişə eyni sxemlə - 4 müdafiəçi ilə oynayır. İstər Çempionlar, Avropa, Konfrans Liqasında olsun, istər çempionatda, istərsə də ölkə kubokunda. Sistem sabit qalır. 5:0-dan sonra bu dəfə beş müdafiəçi ilə oynadılar. Bəlkə də hesab arasında fərq daha böyük olmasın deyə, bu addımı atdılar. Ola bilsin, Bəhlulun zədələnməsi də sxemin dəyişməsinə şərait yaratdı”.