"Qəbələ" Misli premyer-liqasının 21-ci tur matçında "Sumqayıt"la heç-heçə etdi - 0:0.

"Football-plus.az" xəbər verir ki, "qırmızı-qaralar"ın baş məşqçisi Kaxaber Sxadadze oyunsonrası mətbuat konfransında jurnalistlərin suallarını cavabladı.

– Çox danışmayacam. Hər iki komanda yüksək səviyyədə oyun sərgilədi. Bu mövsüm üçüncü dəfədi penaltidən yararlana bilmirik. Məşq prosesində bunun üzərində işləyirik, amma oyunda alınmır. “Sumqayıt” yaxşı komandadı. Baxımlı oyun oldu. Belə rəqibə qarşı oynamaq xoşdu. Biz də meydanda oyun göstərməyə çalışdıq. Qol olmasa da, zövq alınası qarşılaşma oldu. Penalti vurmağı da öyrənsək, daha yaxşı olacaq. Futbolçuların mübarizəsindən razı qaldım. Belə işləsək, mövsümün sonuna kimi daha çox xal toplayacağıq.

– Penalti problemini həll etməyin nəsə yolu var?
– Bu, psixoloji durumla əlaqədardı. Ba Loua yüksək səviyyəli, təcrübəli oyunçudu. Futbolda belə hallar olur. İndi elə vəziyyətdəyik ki, hər oyun xal qazanmalıyıq. Bu durum futbolçulara təsir göstərir.

– Qış fasiləsində komandanı istədiyiniz kimi formalaşdıra bildiz?
– Heyəti gücləndirdik. Bəzi oyunçular komandaya gec qoşulsa da, uyğunlaşa bildilər. İndi müdafiədə də yaxşı oynamağa başlamışıq. Qışdan əvvəl arxa xətdə problemlər var idi. Hazırda həm hücumda, həm də müdafiədə yaxşı çıxış edirik. Hər oyun döyüşməliyik ki, xallar qazanaq, mövsümü istədiyimiz yerdə bitirək.

– AFFA Hakimlər Komitəsi “Sabah”la oyunda sayılmayan qolun izahını verib. Açıqlamadan razı qaldız?
– Oyun artıq bitib. Qərara hörmətlə yanaşıram. Amma mənə elə gəlir, qol var idi.