"Qəbələ" Misli premyer-liqasının 13-cü tur matçında "Araz-Naxçıvan"a qalib gəldi - 2:1.

"Football-plus.az" xəbər verir ki, "qırmızı-qaralar"ın baş məşqçisi Kaxaber Sxadadze oyunsonrası mətbuat konfransında jurnalistlərin suallarını cavabladı.

- Futbolçularımı təbrik edirəm. Onlar xarakter göstərdilər. Bu, çox vacibdi. İki gün əvvəl klub prezidenti ilə çox yaxşı görüşümüz oldu. Ona söz verdik ki, yaxşı mübarizə aparacağıq. Bu gün oyun bir az gərgin başladı. "Araz-Naxçıvan" güclü komandadı, yaxşı hücum potensialına malikdi. Matçın əvvəlində bizdə həyəcan var idi. Buna görə top itkilərinə yol verdik. Qol vurduqdan sonra sakitləşdik və daha rahat oynamağa başladıq. Yenə standart vəziyyətdən qol buraxdıq. İkinci hissəyə yaxşı başladıq. Rəqibə qol imkanı vermədik. Biz çoxlu qol epizodları yaradırıq. Amma onlardan yararlana bilmirilk. Bu gün gördüm ki, bizim potensialımız daha çoxdu. Hələ bir oyun udmuşuq. Qarşıda çox matç var. Bu qələbədən düzgün nəticələr çıxarmalıyıq.

- Neçə turdu ki, qələbə qazanacağınız gözlənilirdi. Bu qalibiyyətin "Qəbələ"nin sizdən əvvəlki baş məşqçisi Elmar Baxşıyevin komandası üzərində olacağını gözləyirdiz?
- Bizim Elmar Baxşıyevə böyük hörmətimiz var. Həm yaxşı insandı, həm də yaxşı məşqçidi. Sadəcə elə alındı ki, onun komandası ilə matçda qələbə qazandıq.

- Nuğay Rəşidov bu gün meydanda ən yaxşılardan idi. Onun performansını necə dəyərləndirirsiz?
- Çox şadıq ki, belə gənc futbolçu yaxşı oynadı. Amma onu çox tərifləməyək. Nuğay sabit oynamalıdı. Bu gün Eşqin də yaxşı mübarizə apardı. Nicat zədəli halda oyuna çıxmışdı. Meydanda bütün gücünü qoydu. Bütün futbolçulara təşəkkür edirəm. Əsl xarakter göstərdilər.

- Murad Musayevin son dəqiqələrdə qırmızı vərəqə almasına münasibətiniz necədi?
- Muradın oyunda yeganə səhvi həmin anda gecikməsidi.. O, tək kapitan deyil, meydanda lider kimi oynayır. Bəlkə də qırmızı vərəqə almaqla bizi xal itkisindən xilas etdi.