Nigeriya premyer-liqasında çıxış edən “Vikki Turists” klubu azarkeşlərinin törətdiyi iğtişaşa görə ağır cəzaya məruz qalıb. Bu barədə Nigeriya Peşəkar Futbol Liqası (NPFL) məlumat yayıb.

"Football-plus.az" xəbər verir ki, fevralın 8-də “Katsina Yunayted”ə qarşı keçirilən oyunda təhlükəsizlik qaydaları kobud şəkildə pozulub. Məlumata görə, meydan sahiblərinin azarkeşləri qadağan olunmuş zonalara daxil olaraq rəqib komandaya və rəsmi şəxslərə hücum çəkiblər. Hadisələr zamanı xəsarət alanlar olub. Ən maraqlı və biabırçı məqam isə azarkeşlərin hakimin fitini oğurlaması ilə bağlıdı. Bununla yanaşı, fanatlar matçdan sonra hakimləri və qonaq komandanı saatlarla stadionda girov saxlayıblar.

Matç 4:4 hesablı heç-heçə ilə nəticələnib. NPFL rəhbərliyi “Vikki Turists”ə ümumilikdə 7,5 milyon nayra məbləğində cərimə kəsib.