Niderlandın Alkmaar şəhərində insident baş verib. Konfrans Liqasının “Alkmaar” – “Legiya” (1:0) matçından sonra qonaq komandanın iki futbolçusu yerli polislər tərəfindən saxlanılıb.

"Football-plus.az" xəbər verir ki, oyundan əvvəl təhlükəsizlik əməkdaşları ilə azarkeşlər arasında qarşıdurma yaşandığından matç sona çatdıqdan sonra “Legiya”nın stadiondan ən sonda çıxması qərara alınıb. 

Futbolçular buna kəskin etiraz ediblər. Polis isə Polşa komandasının avtobusunu mühasirəyə alıb. Hadisə zamanı “Legiya”nın iki futbolçusu - Joseu ilə Radovan Pankov saxlanılıb. Buna müdaxilə etmək istəyən Varşava klubunun sahibi Dariuş Mioduski bir neçə zərbə alıb. Polislər heyətin bəzi üzvlərinə də fiziki təzyiq göstəriblər. Qonaq komanda stadionu iki saatdan çox gözlədikdən sonra tərk edib. Cümə gününə olan məlumata əsasən Niderland polisi saxlanılan futbolçuların aqibəti ilə bağlı açıqlama verməyib.

Polşanın “przegladsportowy” portalınn məlumatına görə, yerli polis matçdan əvvəl qonaq fanatlardan bayraqları almağa çalışıb. Matçdan sonra qonaq azarkeşlər uzun müddət stadionda saxlanılıb. Onlar buna etiraz olaraq polislərə hücum çəkiblər. Nəticədə bir asayiş qoruyucusu huşunu itirib. Polşanın xarici işlər nazirinin müavini Pavel Yablonski Niderland polisinin varşavalı azarkeşlərə qarşı hərəkətlərini “ayrıseçkilik” adlandırıb.