Argentina Futbol Assosiasiyası (AFA) ölkə futbolunda inqilabi xarakterli qərar qəbul edib. Qurum yeni qaydanı yekdilliklə təsdiqləyib.

"Football-plus.az" xəbər verir ki, qərara əsasən, ilk peşəkar müqaviləsini vətənində imzalamadan ölkəni tərk edib xarici klublara üz tutan futbolçular Argentina yığmasının heç bir yaş qrupu üzrə komandasına dəvət almayacaqlar. AFA rəhbərliyinin bu addımı atmaqda əsas məqsədi yerli klubları Avropa nəhənglərindən qorumaqdı. Federasiya hüquqi boşluğun qarşısını bu yolla almağa çalışır.

Belə ki, mövcud qanunvericiliyə görə, valideynlər 18 yaşına çatmamış övladlarının harda yaşayıb işləyəcəyinə qərar verə bilər. Avropa klubları isə bundan istifadə edərək yeniyetmə gənc istedadları transfer haqqı ödəmədən, yalnız cüzi yetişdirmə kompensasiyası qarşılığında ələ keçirirlər.

Bu qərarın verilməsinə son təkan “River Pleyt”in 16 yaşlı kapitanı Lukas Skarlatonun qalmaqallı şəkildə İtaliyanın “Parma” klubuna keçməsi olub.

Qeyd edək ki, əfsanəvi futbolçu Lionel Messi də 13 yaşında “Nyuellz Old Boyz”dan məhz bu sxemlə “Barselona”ya yollanmışdı.