Anatoli Nuriyevin “Zirə”yə keçidində Əsasnamə pozuntusu var?
“Zirə” növbəti transferini reallaşdırıb. Söhbət Anatoli Nuriyevdən gedir. Yığma üzvü “Sabah”la müqaviləyə birtərəfli şəkildə xitam verib və azad agent statusunda “qartallar”la müqavilə bağlayıb.
Nuriyevin adı fevralın 8-də “Sabah”ın oyunçusu kimi “Araz-Naxçıvan”la qarşılaşma üçün iştirak ərizəsində olub, “transfer pəncərəsi” isə fevralın 10-da bağlanıb.
Bəs bu transferin reallaşması 2025/26 mövsümü üçün Azərbaycan premyer-liqası, kuboku, əvəzedicilər liqası və 1-ci liqa yarışlarının Əsasnaməsinin pozulmasına gətirib çıxarmır?
PFL-in Media və Marketinq Departamentinin direktoru Sənan Abdullayev suallarımızı cavabladı:
“Əsasnamədə yazılıb ki, futbolçuların qeydiyyatı və sifarişi iki rəsmi transfer dövründə həyata keçirilir: yay transfer dövrü 19.06.2025 – 10.09.2025, saat 23:59, qış transfer dövrü 14.01.2026 – 10.02.2026, saat 23:59 tarixlərini əhatə edir. Rəsmi transfer dövrləri xaricində klublar azad agent statusuna malik peşəkar oyunçuları (ancaq transfer dövrü bitəndən sonra adı protokola salınmayan oyunçuları) 31 mart 2026-ci il tarixinədək sifariş edə bilərlər. Bildiririk ki, futbolçu ilə “Sabah” arasında müqaviləyə 9 fevral 2026-cı il tarixində qarşılıqlı razılıqla xitam verilib. Bundan sonra həmin tarixdə “Zirə” ilə futbolçu arasında müqavilə bağlanılıb. Əsasnamənin 17-ci bəndinə əsasən qeydiyyat dövrü 10 fevral 2026-cı il saat 23:59-da bitir. Bundan başqa, 31 mart 2026-cı il tarixi azad agent statusuna malik peşəkar oyunçular üçün son tarix müəyyən edilib. Bu halda oyunçunun “Zirə” ilə müqavilə bağlaması Əsasnaməyə uyğundu”.
MÜZƏFFƏR QULUZADƏ
Digər xəbərlər
