"Qarabağ" Misli premyer-liqasının 19-cu turunda "Şamaxı"nın meydanından qələbəylə ayrıldı - 2:1.

"Football-plus.az" xəbər verir ki, Ağdam təmsilçisinin baş məşqçisi Qurban Qurbanov oyunsonrası mətbuat konfransında jurnalistlərin suallarını cavablandırdı.

- Azarkeşlərə təşəkkür edirəm. Belə çətin hava şəraitində komandanın yanında oldular. Futbolçularımı təbrik edirəm. Çox vacib üç xal qazandıq. Birinci hissənin əvvəlində "Şamaxı" bizdən daha aqressiv idi. İkinci hissədə hadisələrin axarına nəzarət edə bildik. Futbolçular belə meydançada topa nəzarət etməyi bacardı. Bunun sayəsində son saniyələrdə qələbə qolu vuruldu. Qarşıdakı oyunlara hazırlaşacağıq.

- "İmişli" ilə matçda da əsas heyəti oynadacaqsız?
- Hansısa dəyişikliklər ola bilər. Bu heyət əvvəlki matçda oynamamışdı. Bir az istirahətə ehtiyacları var idi. Yəqin ki, bəzi rotasiyalar edəcəyik. Bəzi futbolçulardan narazılığım var. İstədiyim performansı göstərə bilmirlər. Belə şəraitdə keyfiyyət göstərmək elə də asan deyil. Amma elə elementlər var ki, onları vaxtında etmək lazımdı.

- Daha əvvəl bəzi menecerlərin futbolçulara mənfi təsir göstərdiyini demişdiz. Nərimanın ABŞ klubuna transferi nə dərəcədə sağlam keçid olacaq?
- Ciddi danışıqlar gedir, sona yaxınlaşır. Bu gün oyundan sonra bir futbolçu mənə yaxınlaşıb dedi ki, yaxşı təklifim var. Bunları əldə saxlamaq heç də asan deyil. Sakitləşdirməyə çalışırıq, başqa xəbərlər gəlir. Futbolçunu da başa düşmək lazımdı. Elə yerlərdən təkliflər gəlir ki, ora ancaq pula görə getmək olar. Elə pul təklif edirlər ki, futbolçular "yox" deyə bilmir. Belə problemlər var. Yenə də oyunlara yaxşı motivasiya ilə hazırlaşmağa çalışırıq.

- "İmişli" ilə oyunun keçiriləcəyi Quba Olimpiya İdman Kompleksinin stadionunun ot örtüyü yaxşı vəziyyətdə deyil. Matçın yerinin dəyişdirilməsi üçün müraciət edəcəksiz?
- Daha razılaşmazlar. Sağ olsunlar, ilk oyunda təklifimizi qəbul etdilər. Bakıda oynasaq, söz-söhbət böyüyəcək. Qubaya gedəcəyik.

- Bəhlul "Qarabağ"da qaldı. Bu qərara nə dərəcədə təsiriniz oldu? Yoxsa Bəhlul özü qalmaqda daha çox maraqlıydı?
- Bəhlulla danışmışdım, razılaşmışdıq. Onun tərəfində idim. Bəzi detallar var. Çox da dərinə getməyək.

- Nəriman Axundzadənin gedişi sizin üçün çətinlik yaratmayacaq?
- Belə oyunçunun komandadan getməsi bizim üçün heç də ürəkaçan deyil. Son vaxtlar baş verən məlum məsələlərə görə getməsi lazım idi. Çünki özündə deyildi. Hər gün fərqli fikirdə idi. Yəqin nəsə oxuyub gəlirdi, qarşısına nəsə çıxırdı. Toparlanması üçün getməyə ehtiyacı var idi. Buna görə belə addım atdıq. Son iki ildə böyümək üçün çox əziyyət çəkib. İnanıram ki, daha yaxşı Nəriman görə biləcəyik.

KƏNAN BAHADIR