"Qarabağ" Misli premyer-liqasının 21-ci tur matçında "Zirə"nin meydanından məğlub ayrıldı - 2:3.

"Football-plus.az" xəbər verir ki, "köhlən atlar"ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavabladı.

- "Zirə"ni, Rəşad Sadıqovu qələbə münasibətilə təbrik edirəm. Çox yaxşı və baxımlı oyuna şahidlik etdik. Nəsə işlərimiz qaydasında deyil. Lakin bunu normal qarşılayıram. Geri qayıdacağıq. Komandanı bəzi oyunlara istədiyimiz kimi hazırlaşdıra bilmirik. 3-4 gündən bir meydana çıxırıq. Bəzi futbolçular uzun müddət idi şans qazanmırdı. Bu gün əvvəldən sona qədər meydanda oldular. Bəli, səhvlərimiz var. Bunu danmırıq. "Zirə" layiqli qələbə qazandı. Qarşıdakı oyunlara hazırlaşacağıq.

- Bu gün beş futbolçunu əvəzlədiz. Hadisələrin axarı sizi qane etmirdi?
- Həm hadisələrin axarına uyğun addım atdıq, həm də bəzi futbolçuların hazırlıq səviyyəsi istədiyimiz kimi deyil. Bu gün Benzya ilə Zubiri meydana buraxmaq fikrim yox idi. Ona görə ki, istirahətə daha çox ehtiyacları var. Futbolda belə hallar olur.

- "Qarabağ"ın bu qədər ardıcıl məğlubiyyətlərini xatırlamırıq. Bunun səbəbi nədi?
- Çatışmayan cəhətlər var. Görünür, səhvlərimiz çoxdu. İnşallah, qayıdacağıq.

- Benzyanın ayrılacağı haqda xəbərlər yayılıb. Məlumatlar doğrudumu?
- Xeyr, Benzya komandadadı.

KƏNAN BAHADIR