"Qarabağ" Misli premyer-liqasının 8-ci tur matçında "Turan Tovuz"a qalib gəldi - 2:1.

"Football-plus.az" xəbər verir ki, "köhlən atlar"ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavabladı.

- Çox vacib qələbə qazandıq. Futbolçularımı təbrik edirəm. Komandada balans yox idi. Çünki futbolçular xeyli müddətdi bir yerdə deyildi. Heyətdə rotasiyalar etmişdik. Topla tam istədiyimiz kimi davrana bilmirdik. Rəqib ilk hissədə buna imkan vermirdi. İlk yarıda top 12-15 dəqiqə oyunda oldu. Daha çox uzun toplar, mübarizə var idi. Demək olar ki, heç nə edə bilmirdik. Top 2-3 dəqiqə oyunda qalmırdı ki, meydanda düzgün yerləşək. Amma ikinci hissədə tam fərqli oyun oldu. Rəqibin gücü bir az azaldı. İlk yarıda çox enerji itirdilər. İkinci hissədə daha rahat oynamağa başladıq. Çox vacib 3 xal qazandıq. Futbolçular çox əziyyət çəkdi. Hər iki komandanın azarkeşlərinə təşəkkür edirəm. "Turan Tovuz"a uğurlar arzulayıram.

- Marko Yankoviçi "Atletik"lə matçda start heyətində görə bilərik?
- Sabah məşqimiz olacaq. Qarşıda bir neçə gün vaxt var. Düzünü desəm, bu gün onu daha çox oynatmaq istəyirdim. Ən azı 30 dəqiqə... Oyun elə getdi ki, ehtiyatlandım. Mübarizə var idi, meydança sürüşkən idi. Ona görə Yankoviçi bir az gec oyuna buraxdım. Oyuna kimi lazım olan qərarı verəcəyik.

- "Atletik"i təhlil etməyə vaxt olub?
- Tam etməmişəm, amma maraqlanmışam. Bu gündən etibarən bütün detallara ayrı-ayrılıqda vaxt ayıracağıq. 

- "Atletik"lə oyunda fərqli gedişlər görəcəyik?
- İllərdi nə etmişiksə, onu etməyə çalışacağıq. Çünki biz onu daha yaxşı edə bilirik. Amma bəzi rəqiblərə qarşı oyunun gedişində elə detallar var ki, futbolçulara tapşırıq veririk, onlar yerinə yetirir. İstənilən komandanın özəlliyi var. Onun qarşısını almaq üçün diqqəti olmalıyıq. Statistikaya görə "Atletik" ən dinamik futbol oynayan komandalardandı. Hətta birinci yerdə idilər. Öz oyunumuzu daha da yaxşılaşdırmağa və rəqibin oyun üslubunun qarşısını almağa çalışacağıq. Qarşı tərəfin buna nə qədər imkan verəcəyini matçda hiss edəcəyik.